مۇحتار قۇل-مۇحامەد: ەلباسى جاڭا الەمدە جاڭا قازاقستاندى قۇردى
بۇل تۋرالى استانادا «نۇر وتان» پارتياسىنىڭ ساياسي كەڭەسىنىڭ كەڭەيتىلگەن وتىرىسىندا «نۇر وتان» پارتياسى ءتوراعاسىنىڭ ءبىرىنشى ورىنباسارى مۇحتار قۇل-مۇحامەد ءمالىم ەتتى، دەپ حابارلايدى «قازاقپارات» ح ا ا ءتىلشىسى.
«نۇر وتان» پارتياسى ءتوراعاسىنىڭ ءبىرىنشى ورىنباسارى قازاقستاننىڭ الەم مويىنداعان بىرەگەي جەتىستىكتەرى ەلباسىنىڭ ستراتەگياسىنىڭ، باعا جەتپەس حالىقارالىق ابىرويى مەن ساياساتىنىڭ زاڭدى ناتيجەسى ەكەنىن اتاپ ءوتتى.
«ءسىزدىڭ مەگايندۋسترياليزاتسيا بويىنشا اتقارعان جۇمىسىڭىزدىڭ ارقاسىندا ءبىزدىڭ مەملەكەتىمىز مودەرنيزاتسيالىق جانە يننوۆاتسيالىق الاڭعا اينالدى. ءسىز جاڭا الەمدە جاڭا قازاقستاندى قۇردىڭىز. ءسىزدىڭ كوشباسشىلىعىڭىزبەن ءبىز الدىمىزدا جوعارى ماقسات قويۋمەن بىرگە وسى مەجەلەردى باعىندىرۋدى دا ۇيرەندىك. «ەكسپو-2017» حالىقارالىق كورمەسىنىڭ وتكىزىلۋى قازاقستان مەن مەملەكەت باسشىسىنىڭ مۇمكىندىكتەرىن تاعى ءبىر مارتە الەمگە پاش ەتە ءتۇستى»، - دەيدى مۇحتار قۇل-مۇحامەد.
ونىڭ ايتۋىنشا، باسەكەگە قابىلەتتىلىك بويىنشا جاھاندىق يندەكسىندە، ينۆەستورلاردىڭ قۇقىعىن قورعاۋ رەيتينگىندە قازاقستان بيىلعى جىلى ءۇشىنشى ورىندى يەلەنگەن.
«ءسىز ءوز سوزىڭىزدە ەلدەگى بارلىق رەفورمالار قازاقستاندىقتاردىڭ ءومىرىن جاقسارتۋعا باعىتتالاتىنىن ايتىپ كەلەسىز. ب ۇ ۇ- نىڭ ادام كاپيتالىنىڭ دامۋى كورسەتكىشى بويىنشا ءبىزدىڭ ەلدىڭ رەيتينگى سوڭعى ەكى جىلدا عانا 14 پوزيتسياعا جاقسارا ءتۇستى. ءسىز قۇرعان، ءسىزدىڭ كوشباسشىلىعىڭىزدىڭ ارقاسىندا ءىرى، ساياسي، كادرلىق ءارى شىعارماشىلىق الەۋەتكە يە بولعان «نۇر وتان» پارتياسى الداعى ۋاقىتتا بيىك اسۋلاردى باعىندىرۋدا، مەملەكەتتىڭ مودەرنيزاتسيالانۋى جۇمىسىنا بەلسەنە اتسالىساتىن بولادى»، - دەيدى ول.
مۇحتار قۇل-مۇحامەد سونىمەن بىرگە، قازاقستان ۇدايى ءوسۋ-وركەندەۋ ۇستىندەگى ەل ەكەنىن تىلگە تيەك ەتتى.
«مەملەكەت بيۋدجەتىنىڭ 17 جىلدىڭ ىشىندە عانا 591 ميلليارد تەڭگەدەن 12,5 تريلليونعا، ناقتىلاپ ايتقاندا 21 ەسەگە دەيىن ارتۋى قازاقستاندىقتاردىڭ ءال-اۋقاتىنىڭ ەسەلەپ ءوسۋىنىڭ ايقىن دالەلى. 21-عاسىردا الەمنىڭ بىردە-ءبىر ەلىندە ءدال وسىنداي عاجايىپ ءوسىپ-وركەندەۋ بولعان ەمەس. جاڭا الەمدەگى جاڭا قازاقستان دەگەن وسى دەپ بىلەم. قازىرگى تاڭدا بۇكىل الەم، دامىعان مەملەكەتتەردىڭ ءوزى ساياسي-ەكونوميكالىق جاعىنان جاڭارۋ ۇدەرىسىن باستان وتكەرۋدە. سوندىقتان، قازاقستانمەن بىرگە پارتيامىز دا ءوزىنىڭ جاڭعىرۋ كەزەڭىنە اياق باستى. ءسىز بەلگىلەگەن بيىك ماقساتتارعا جەتۋ جولىندا ءوزىڭىز ءتوراعالىق ەتەتىن «نۇر وتان» پارتياسى قولدان كەلگەننىڭ ءبارىن جاسايتىن بولادى»، - دەيدى «نۇر وتان» پارتياسى ءتوراعاسىنىڭ ءبىرىنشى ورىنباسارى.
ەسكە سالا كەتسەك، استانادا بۇگىن ەلباسى نۇرسۇلتان نازاربايەۆتىڭ توراعالىعىمەن «نۇر وتان» پارتياسى ساياسي كەڭەسىنىڭ كەڭەيتىلگەن وتىرىسى ءوتىپ جاتىر. وتىرىستىڭ كۇن تارتىبىندە پارتيانىڭ 2017-جىلدىڭ 10 ايىندا ەلىمىزدىڭ ساياسي، ەكونوميكالىق جانە رۋحاني جاڭعىرۋى اياسىندا اتقارعان جۇمىسى، سونىمەن قاتار «نۇر وتان» پارتياسى ساياسي كەڭەسى بيۋروسىنىڭ قۇرامىنا وزگەرتۋلەر ەنگىزۋ ماسەلەسى قارالۋدا.
