باتىس قازاقستاندا ساقشىلار ەندى اتپەن جۇرەدى
مىنە، 2017-جىلى وبلىستىق بيۋدجەتتەن قارجى ءبولىنىپ، وبلىستىق ىشكى ىستەر دەپارتامەنتىنىڭ جانىنان كاۆالەريالىق ۆزۆود اشىلدى.
سالت اتتى ساقشى، اسىرەسە قالتارىس-بۇلتارىسى كوپ جەكە سەكتوردى، ساياجاي اۋماقتارىن باقىلاۋعا اسا قولايلى. ورال قالاسىنىڭ اينالاسىندا 150 باعبانشىلىق قوعامى، 16 مىڭعا جۋىق ساياجاي ۋچاسكەسى بار ەكەن.
وعان قوسا جايىق، شاعان، دەركول وزەندەرىنىڭ جاعاسى دا ورمان-توعايمەن قورشالعان. اۆتوكولىك جۇرە المايتىن جەر كوپ. ال قۇقىق قورعاۋشىلار وسىنداي جەرلەردە قاراقشىلىق، ۇرلىق، توبەلەس ءجيى بولىپ، ماسكۇنەمدەر مەن قاڭعىباستار جينالاتىن قىلمىستى مەكەنگە اينالاتىنىن ايتادى.
- كاۆالەريا ۆزۆودى جازعى ۋاقىتتا قالا ماڭىندا جەلايەۆ اۋدانىنداعى «كارەر»، «سايا» جاعاجايلارىندا، قالا ورتالىعىنداعى كيروۆ اتىنداعى ساياباقتىڭ جانىنداعى جاڭادان قۇرىلعان ۆەلوجولاق بولىگىندە جۇمىس اتقاراتىن بولادى.
اتتاردىڭ پايداسى - ولار كولىك ءجۇرىپ وتە المايتىن، ادام جاياۋ كوپ ءجۇرىپ جەتە المايتىن جەرلەردە قىزمەت ەتەدى»، دەيدى ورال قالالىق ىشكى ىستەر باسقارماسى جەرگىلىكتى پوليتسيا قىزمەتىنىڭ باستىعى، پوليتسيا پودپولكوۆنيگى ءمۇسلىم جاردەموۆ.
ۆزۆودتا ازىرگە 25 جىگىت بار. سالت جۇرۋگە يكەمى بار، جىلقى مالىن جاقسى كورەتىن قىزمەتكەرلەر ىرىكتەلىپ الىنعان. سونداي-اق ۆزۆود اۋماعىندا ارنايى ساباق وتكىزىپ، سالت اتپەن ءجۇرۋ داعدىلارىن ۇيرەتەتىن مامان دا بار.
«كاۆالەريستىڭ قىزمەت اتقارۋ مەرزىمى ساعات 10:00 دەن 15:00 گە دەيىن جانە ساعات 15:00 دەن 19:00 گە دەيىن جالپى 6 ساعات، سونداي-اق جۇمىس كەستەسىنە سايكەس مينۋس 15-20؛س گرادۋس سۋىقتا جانە +30-35؛س گرادۋس ىستىقتا جۇمىس كۇنى 4 ساعاتقا دەيىن قىسقارادى.
تەمپەراتۋرا مينۋس 20 دان تومەن نەمەسە +36 دان جوعارى بولسا، اتپەن قىزمەت اتقارۋ توقتاتىلادى. پاترۋل كەزىندە كەمىندە ەكى قىزمەتكەر بىرگە جۇرەدى»، دەپ ءتۇسىندىردى كاۆالەريا ۆزۆودىنىڭ كومانديرى، پوليتسيا اعا لەيتەنانتى مۇحيت ابۋلحايروۆ.
ارينە، قوعامدىق ءتارتىپتى ساقتاۋعا قىزمەت ەتەتىن اتتارعا دا بارلىق جاعداي جاسالعان. اتتى ۆزۆود بازاسى اشىلىپ، ارنايى تەحنيكالارىمەن قامتاماسىز ەتىلگەن. كوشىم تۇقىمداس 25 سايگۇلىكتىڭ ءارقايسىسىنا جەكە اتقورا جاساقتالىپ، ات قويىلعان.
ولاردى تاسىمالدايتىن تىركەمەلەر الىنعان، ارنايى مال دارىگەرى جۇمىس ىستەيدى. قۇنان، دونەن كەزىندە اكەلىنگەن جىلقىلار پوليتسيانىڭ جارىق، دىبىس بەلگىلەرىنە ۇيرەتىلىپ، اسكەري ءومىر ءتارتىبىن باستاپ تا كەتتى.
قازبەك قۇتتىمۇرات ۇلى،
«ەگەمەن قازاقستان»
