اتامبايەۆ ۇسىنعان جاڭا مەرەكە رەسەيدىڭ اشۋىن كەلتىردى
ل د پ ر قىرعىزستاندىقتارعا ۇلتتىق جۇرگىزۋشى كۋالىگىمەن رەسەيدە ەمىن-ەركىن جۇمىس ىستەۋىنە تىيىم سالۋدى ۇسىنۋدا.
بۇل تۋرالى NUR. KZ پورتالى kaktus.media سايتىنا سىلتەمە جاساپ حابارلايدى.
ل د پ ر وكىلى يگور لەبەديەۆ قىرعىزستان ازاماتتارىنا رەسەيدە ۇلتتىق جۇرگىزۋشى كۋالىگىمەن كولىك باسقارۋىنا تىيىم سالۋدى پارلامەنتكە ۇسىنۋعا نيەتتى ەكەندەرىن جەتكىزدى.
ايتا كەتەرلىگى، شىلدە ايىندا رەسەي پرەزيدەنتى قىرعىزستاندىقتارعا ءوز جۇرگىزۋشى كۋالىگىمەن رەسەيدە ەمىن-ەركىن كولىك باسقارۋىنا رۇقسات بەرگەن بولاتىن.
«بۇعان تەك ساياسي تۇرعىدان رۇقسات ەتىلگەن ەدى. سەبەبى قىرعىزستاندا ورىس ءتىلى ەكىنشى ۇلتتىق ءتىل سەكىلدى. الايدا قازىر قىرعىزدار قىرعىزستاننىڭ رەسەيگە قارسى شىققان كۇنىن ۇلتتىق مەرەكە ەتكەنىن كورىپ وتىرمىز»، - دەيدى لەبەديەۆ.
ول بۇل قادام ەكى ەل اراسىنداعى دوستىق قارىم-قاتىناسقا قاياۋ تۇسىرەتىنىن، سول سەبەپتى ساياسي تۇرعىدان قىرعىزدارعا جەڭىلدىك بەرۋدىڭ قاجەتتىلىگى بولماي قالعانىن العا تارتتى.
ەسكە سالساق، اعىمداعى جىلدىڭ 14- شىلدەسىندە رەسەيدىڭ مەملەكەتتىك دۋماسى قىرعىزستان ازاماتتارىنا ءوز جۇرگىزۋشى كۋالىگىمەن رەسەيدە جۇرگىزۋشى بولىپ جۇمىس ىستەۋىنە رۇقسات ەتەتىن زاڭدى ماقۇلداعان بولاتىن.
ال 26- قازان كۇنى پرەزيدەنت المازبەك اتامبايەۆ 7-8- قازان كۇنى «تاريح جانە اتا-بابا ەستەلىگى» كۇنىن اتاپ ءوتۋ تۋرالى جارلىققا قول قويعان.
