ماقپال ءجۇنىسوۆا مارقۇم زامانبەكتەن كەيىن نەگە تۇرمىسقا شىقپاي قالعانىن ايتتى
ءانشىنىڭ ايتۋىنشا، اناسى ونىڭ ەكىنشى مارتە تۇرمىسقا شىعۋىنا قارسىلىق ءبىلدىرىپ، ءتىپتى بۇل تۋرالى ايتۋعا تىيىم سالعان.
«باياعىدا زاكەڭ ايتۋشى ەدى: «كۇن سياقتى ادامدارعا قاتتى جاقىنداما، قاناتىڭدى كۇيدىرىپ الاسىڭ»، - دەپ. ءومىرىمدى باسقاشا قىلىپ وزگەرتكىم كەلەدى. كۇيەۋگە تيەيىن دەپ جاتقام جوق، ەشكىم قۇدا تۇسكەن جوق (كۇلىپ) «مىنا قىز بىرەۋمەن جۇرەتىن شىعار، كۇيەۋگە شىعىپ كەتكەن شىعار، نەگە ۇندەمەيدى»، - دەپ ويلايدى عوي بىرەۋلەر.
ءوزىم شەشەمە تارتقانمىن، مەنى دە سولاي شەگەلەپ تاستادى عوي. شەشەم ءوزى 47 جاسىندا جەسىر قالعان، مەن دە سول شامالاس قالدىم عوي. اكەمىز قايتقان كەزدە كەنجە قىزىمىز 4 جاستا بولاتىن، سودان كەيىن انام ەشكىمگە كوزىن سۇزبەدى، ەشكىممەن جۇرمەدى. «ءاي، ولگەن جوقپىز عوي، سەكسەنگە كەلدىك»، - دەيدى قازىر.
دارىگەرلەرگە بارسام ماعان: «ءسىز ەر اداممەن تۇرۋ كەرەكسىز، تابيعاتتىڭ زاڭىن بۇزىپ جاتسىز. تۇرمىسقا شىعىڭىز»، - دەپ ايتادى.
دارىگەرلەردىڭ ايتقانىن اناما جەتكىزگەنمىن. سويتسەم ول كىسى: «باستى قاتىرماسىن! انا مەرەيدى ءوسىر! الجىما، سەنىڭ شەشەڭ ولگەن جوق. سەندەردى ءوسىرىپ سەكسەنگە جەتتىك»، - دەپ شەگەلەپ ايتتى.
شەشەم ءسويتىپ ايتقان سوڭ ۇيالدىق. وسىدان كەيىن تۇرمىس قۇرۋ تۋرالى تاقىرىپتى جاۋىپ قويدىق، ەشكىم دە ماعان قۇدا تۇسكەن جوق. ادام بالاسى بولعان سوڭ ويلاپ قوياسىڭ. ماحاببات تۋرالى كينو كورسەڭ، قىز بەن جىگىت قاتار وتىرىپ، ءسۇيىسىپ وتىرسا ەسىڭە تۇسەدى. ءبىراق ءوزىمدى بىردەن جيناپ الامىن»، - دەيدى ءانشى.
ءانشى بۇگىندە بار ارمانى قىزىن جەتكىزىپ، سونىڭ باقىتىن كورۋ كەرەك ەكەنىن ايتتى. دەگەنمەن ول رۋحاني الەمى باي، جاقسى ادامدارعا عاشىق بولۋدىڭ ەش ابەستىگى جوق ەكەنىن جەتكىزدى.
