الماتى وبلىسىندا ەسەپتە تۇرعان جەتكىنشەكتەر تۇرمەدەگىلەردىڭ ومىرىمەن تانىستى
پروكۋرورلار 13 وقۋشىنى الماتى قالاسىنداعى ل ا 155/6 كولونياسىنا ارنايى اپاردى، دەپ حابارلايدى قازاقپارات ءتىلشىسى.
تۇزەۋ مەكەمەسىندە كامەلەتتىك جاسقا تولماعان 50 گە جۋىق بالا جازاسىن وتەپ جاتىر. ولارعا تاعىلعان ايىپ ءار ءتۇرلى. ءبىرى ۇرلىق جاساسا، ەندى بىرەۋلەرى كىسى ءولتىرىپ، ءدىني تەرىس اعىمدى ناسيحاتتاپ سوتتالعان.
ولاردىڭ ءبىرى جاساعان ارەكەتىنە قاتتى وكىنەتىنىن ايتىپ، قوناققا كەلگەن قاتارلاستارىنا دۇرىس جۇرۋگە كەڭەس بەردى.
ەسكەلدى اۋدانىنىڭ پروكۋرورلارى بۇل شارانى ىشكى ىستەر بولىمىندە تىركەۋدە تۇرعان جاس وسپىرىمدەر سوتتالعان زامانداستارىنىڭ قاتەلىكتەرىن قايتالاماۋى ماقساتىندا ۇيىمداستىردى.
تەمىر توردىڭ ار جاعىنداعى تىرشىلىكتەن ساباق العان وقۋشىلار، بولاشاقتا ءتارتىپ بۇزباي، دۇرىس ءجۇرىپ-تۇرۋعا بەلىن بەكەم بۋىپ قايتتى.
