تايلاند تۇرمەسىندە وتىرعان قازاقستاندىق ايەل ونداعى ازاپتى كۇندەرى تۋرالى ايتىپ بەردى
الماتىلىق ءالينانى تايلاند دۇكەنىندە داۋ شىعارىپ، ازداپ توبەلەسىپ قالعانى ءۇشىن پوليتسيا الىپ كەتكەن. ءتىپتى ءىس سوتقا دەيىن بارعان.
«كاراۆان» گازەتىنىڭ تىلشىسىنە سۇحبات بەرگەن الينانىڭ ايتۋىنشا، وعان قاتىستى سوت ۇستالعان كۇننىڭ ەرتەڭىندە بولىپتى.
«ءبارى جىميىپ تۇرادى ەكەن. اۋدارماشى سوزدەرىمدى اۋدارىپ بەردى. پوليتسەيلەر جازىپ الىپ وتىردى. ءبىراق تاعدىرىم الدىن الا شەشىلىپ قويعان سياقتى. مەن كىنالى ەكەنىمدى مويىنداۋعا ءماجبۇر بولدىم. ويتكەنى تاي ەلىنىڭ زاڭى بويىنشا، مويىنداساڭ، جازاڭ جەڭىلدەيدى. قايتا توبەلەس ساعات 16:00 گە دەيىن بولىپ، جولىم بوپ كەتتى. بۇل ۋاقىتتان كەيىن بولعان جايتتار الدەقايدا اۋىر قىلمىس دەپ ەسەپتەلىپ، جازا مەرزىمى دە كوپ ۇزارادى» دەيدى ءبىزدىڭ كەيىپكەرىمىز.
سونداي-اق، ءالينا جاتقان كامەراسىنداعى جاعدايدىڭ دا سۇمدىق ەكەنىن ايتىپ وتىر.
«زاتتارىمدى الىپ قويىپ، دىمقىل ءيسى بار جەيدە مەن بەلدەمشە بەردى. كامەراسى ەشقانداي جيھازى جوق كەڭدەۋ بولمە ەكەن. ءبىراق وندا 60 ادام تۇنەيدى. ءبارى بانكىگە جابىلعان شپروت سياقتى ءبىر-ءبىرىنىڭ ۇستىنە مىنگەسىپ جاتادى. سولاي سىعىلىسىپ وتىرادى. قايتا جىلى كليمات جاقسى بولدى. دارەتحانانى كافەلمەن ءبولىپ قويعان. ەسىگى جوق. توپتاسىپ دۋشقا تۇسەمىز. قاداعالاۋشى 10 عا دەيىن ساناپ بولعانشا شومىلىپ ءبىتۋىڭ كەرەك. سوسىن ەكىنشى لەگى كەلەدى. ۇلگەرمەسەڭ، ءوز وبالىڭ وزىڭە. جارىقتى جاعىپ قويىپ ۇيىقتايمىز. ساعات تورتتە تۇرعىزادى» دەيدى ءالينا.
ونىڭ ايتۋىنشا، تايلاندتا ويلاماعان جەردەن بولماشى جاعدايمەن تۇرمەگە ءتۇسىپ قالۋىڭ عاجاپ ەمەس.
«مىسالى، بۋددانىڭ باس مۇسىنشەسى كادەسىي رەتىندە بارلىق جەردە ساتىلادى. ونى باسقا ەلگە الىپ كەتۋگە تىيىم سالىنعان ەكەن. سوندىقتان اۋەجايدا بالەگە تاپ بولۋىڭىز مۇمكىن. تۇرمەدە كۇيەۋىمەن بىرگە كەلىسىم-شارت بويىنشا جۇمىس ىستەۋگە بارعان اياعى اۋىر اعىلشىن ايەل وتىرعان ەدى. ولار جالعا العان پاتەر ورنالاسقان پودەزدە ەسىرتكى ساتىلىپتى. ال ارنايى وپەراتسيا كەزىندە ەرلى-زايىپتىلاردى ەسىرتكى ساتۋشىلارمەن بىرگە الىپ كەتكەن. تايلاند سوتىنا ءبىر نارسەنى دالەلدەۋ مۇمكىن ەمەس. تايلىقپەن ارادا تۋىنداعان كەز-كەلگەن جانجالدا ءوزىڭ كىنالى بولىپ شىعاسىڭ. ەگەر سەنى سول ەلدىڭ ازاماتى سان سوقتىرىپ كەتىپ، سوسىن اقشاڭنىڭ قايتارىلۋىن تالاپ ەتسەڭ، ءوزىڭدى بوپسالاۋشى دەپ ايىپتايدى» دەيدى اتالعان ەلدىڭ تۇرمەسىندە ءۇش اي وتىرعان قازاقستاندىق ايەل.
