سارا نازاربايەۆا ۇزاق ۇزىلىستەن كەيىن حالىق الدىنا شىعا باستادى - كەسكىن
بۇل تۋرالى «الماتى» تەلەارناسى حابارلادى.
ءۇش كۇنگە سوزىلاتىن جيىنعا شەتەل جانە وتاندىق عالىم، ۇستازدار قاتىسۋدا. شارادا بالا تاربيەسى، مۇعالىمنىڭ قوعامداعى ءرولى، ادامزاتتىڭ جان تىنىشتىعى سياقتى ماسەلەلەر ءسوز بولدى. «ءوزىن-ءوزى تانۋ» ءپانىنىڭ نەگىزىن قالاۋشى سارا نازاربايەۆا فورۋمعا ارنايى كەلىپ، «بوبەك» قورىن 20 جىل تولۋىمەن قۇتتىقتادى.
«ءبىزدىڭ الدىمىزدا وسكەلەڭ ۇرپاقتى شىنايىلىققا، مەيىرىمدىلىك پەن سۇيىسپەنشىلىككە تاربيەلەۋ ميسسياسى تۇر. بارلىعىڭىزدى ادام قۇندىلىقتارىن باستى باعىت ەتكەن - «ءوزىن- ءوزى» تانۋ ءىلىمىنىڭ 20 جىلدىعىمەن قۇتتىقتايمىن. ادامگەرشىلىككە باۋلىپ، مەيىرىمدىلىك جاساۋعا ءوز ۇلەسىن قوسىپ جۇرگەن عالىم، پەداگوگتارعا، ادىسكەرلەرگە، «بوبەكتىڭ» باستامالارىن قولداۋشىلارعا شىنايى العىس ايتامىن»، - دەدى «بوبەك» رەسپۋبليكالىق بالالار قايىرىمدىلىق قورىنىڭ پرەزيدەنتى سارا نازاربايەۆا.
«بوبەك» ورتالىعى جۇمىسىن باستاعالى بەرى ونىڭ قۇرامىندا گۋمانيتارلى كوللەدج، گيمنازيا، «ءوزىن-ءوزى تانۋ» بالاباقشاسى مەن استرونوميالىق وبسەرۆاتوريا جۇمىس ىستەيدى. بۇل ءبىلىم وردالارىنان تۇلەگەن جاستار ءومىردىڭ كەز كەلگەن سالاسىندا ءوز ورنىن تاۋىپ ۇلگەرگەن. مۇعالىمدەرگە دە جاعداي جاسالىپ، ولاردىڭ كاسىبيلىگىن جوعارىلاتۋعا ايرىقشا كوڭىل بولىنگەن. قوردىڭ مەرەيتويىن قۇتتىقتاۋعا قالا اكىمى باۋىرجان بايبەك كەلىپ، ورتالىقتىڭ ءبىلىم سالاسىنا قوسقان ۇلەسىن اتاپ ءوتتى.
«بوبەك» ورتالىعى ءوزىن-ءوزى تانۋ باعدارلاماسىن جۇزەگە اسىرىپ كەلە جاتقان جاڭا سيپاتتاعى ءبىلىم بەرۋ بەسىگى ەكەندىگى بارشامىزعا بەلگەلى. وسى ۋاقىتتىڭ ىشىندە زاماناۋي تاسىلدەردى يگەرگەن ورتالىق ۇجىمى بالالاردى جالپى ادامدىق قۇندىلىقتارمەن سۋسىنداتا وتىرىپ، ەلىنىڭ پاتريوتى بولۋعا تاربيەلەۋدە ەلەۋلى تابىستارعا قول جەتكىزدى»، - دەدى الماتى قالاسىنىڭ اكىمى باۋىرجان بايبەك.
«20 جىلدا «بوبەك» ورتالىعى وسكەلەڭ ۇرپاقتىڭ رۋحاني ادامگەرشىلىك مادەنيەتىن دامىتۋعا، ءبىلىم بەرۋ سالاسىندا ادامي قاسيەتتى وقىپ ۇيرەنۋگە كوپ جاعداي جاسادى. بالالارعا جانە قولداۋ قاجەت ەتەتىن جاندارعا كومەك كورسەتىپ، قورعان بولدى»، - دەدى ق ر ءبىلىم جانە عىلىم ءمينيسترى ەرلان ساعاديەۆ.
