الماتىدا ايگىلى ماجار عالىمى ماندوكيدى ەسكە الدى
قۇرامىندا اكادەميا باسشىسى دارحان قىدىرالى، ماجارستاننان ارنايى كەلگەن عالىمنىڭ جارى وڭايشا ماقسۇم قىزى، تۇركى كەڭەسى اقساقالدار كەڭەسىنىڭ مۇشەسى ءادىل احمەتوۆ، ماجارستاننىڭ الماتىداعى باس كونسۋلى فەرەنتس بلاۋمان، قىرعىزستانداعى ماناس قىرعىز- تۇرىك ۋنيۆەرسيتەتىنىڭ پروفەسسورى قادىرالى قوڭقابايەۆ جانە ا. بايتۇرسىن ۇلى اتىنداعى ءتىل ءبىلىمى ينستيتۋتىنىڭ ديرەكتورى ەردەن قاجىبەك بولعان دەلەگاتسيا الدىمەن الماتىداعى ي. ق. ماندوكي اتىنداعى №154 مەكتەپكە باردى.
مەكتەپ مۇعالىمدەرى مەن وقۋشىلاردىڭ قاتىسۋىمەن وتكەن القالى شارادا د. قىدىرالى جانە عالىمنىڭ كوزىن كورگەن، ەڭبەكتەرىمەن ەتەنە تانىس زامانداستارى ماندوكيدىڭ ءومىرى مەن تۇركىتانۋ عىلىمىنا قوسقان زور ۇلەسى جايلى اڭگىمەلەدى. سونىمەن قاتار، مەكتەپتەگى ي. ق. ماندوكي مۇراجايىن ارالاپ كوردى.
جيىن سوڭىندا د. قىدىرالى مەكتەپ كىتاپحانا قورىنا اكادەميا ازىرلەپ باسقان ءبىرقاتار كىتاپتاردى تارتۋ ەتتى. بۇدان وزگە، TWESCO بەلگىلى تۇركولوگ عالىمدار مەن ي. ق. ماندوكيدىڭ ارىپتەستەرى جانە شاكىرتتەرىنىڭ باسىن قوسىپ، مەيرامحانادا ارنايى اس بەردى. بيىل دۇنيەدەن وزعانىنا 25 جىل تولعان تۇركى جۇرتىنا ورتاق عالىم جايلى ەستەلىكتەر ايتىلعان استان كەيىن قاتىسۋشىلار ي. ق. ماندوكيدىڭ كەڭسايداعى زيراتىنا بارىپ، گۇل شوقتارىن قويدى.
ايتا كەتۋ كەرەك، يشتۆان قوڭىر ماندوكي 1944- جىلى ماجارستاننىڭ كارتساگ قالاسىندا دۇنيەگە كەلگەن. نەگىزىنەن ماجارلاردىڭ جانە قۇمانداردىڭ كونە تاريحى مەن تۇركى- ماديار بايلانىستارىن زەرتتەگەن ايگىلى قىپشاقتانۋشى، تۇركولوگ عالىم. تۇركى تانۋ عىلىمىنا سۇبەلى ۇلەس قوسقان عالىم وتىز تىلدە سويلەي الاتىن بولعان. 1992- جىلى داعىستاندا كوز جۇمعان عالىمنىڭ سۇيەگى ءوز وسيەتى بويىنشا الماتىداعى كەڭساي زيراتىنا جەرلەنگەن.
