قازاق كۇرەسىن وليمپيادا ويىندارىنا قوسقىمىز كەلەدى - بوزىمبايەۆ
اشىلۋ سالتاناتىنا قازاق كۇرەسى حالىقارالىق فەدەراتسياسىنىڭ پرەزيدەنتى قانات بوزىمبايەۆ، ق ر مادەنيەت جانە سپورت مينيسترلىگى سپورت جانە دەنە شىنىقتىرۋ ءىسى كوميتەتىنىڭ ءتوراعاسى ەلسيار قاناعاتوۆ قاتىسىپ، سپورتشىلارعا ساتتىلىك تىلەدى.
العاشقى بولىپ ءسوز العان ەلسيار قاناعاتوۆ ءتول سپورتىمىزدان ءوتىپ جاتقان الەم بىرىنشىلىگىنىڭ رەسمي تۇردە باستالعانىن جاريالادى.
«بۇگىن وزدەرىڭىز كورىپ وتىرعانداي ەلوردامىزدا ءتول سپورتىمىزدان الەم بىرىنشىلىگى ءوتىپ جاتىر. مەن قر مادەنيەت جانە سپورت مينيسترلىگىنىڭ اتىنان جارىسقا كەلگەن بارلىق بالۋاندارعا العىسىمدى بىلدىرە وتىرىپ، بارشالارىڭىزعا ساتتىلىك تىلەيمىن. ءبىز وسىنداي جارىستار ۇيىمداستىرۋ ارقىلى قازاقتىڭ ءتول سپورتىن بۇكىل الەمگە ناسيحاتتاپ جاتىرمىز. بۇل قازاق سپورتىن، سونىڭ ىشىندە قازاق كۇرەسىن دامىتۋ باعىتىندا جاسالىپ جاتقان تىڭ قادامداردىڭ ءبىرى»، - دەدى ەلسيار قاناعاتوۆ.
قازاق كۇرەسى حالىقارالىق فەدەراتسياسىنىڭ پرەزيدەنتى قانات بوزىمبايەۆ ءوز كەزەگىندە قازاق كۇرەسىنىڭ كۇن وتكەن سايىن تانىمالدىعى ارتىپ كەلە جاتقانىن باسا ايتتى.
«بۇگىنگى تاڭدا قازاق كۇرەسىنىڭ كۇن ساناپ تانىمالدىعى ارتىپ كەلەدى. 2016 -جىلدان باستاپ يۋنەسكو ونى ماتەريالدىق ەمەس مادەني مۇرا تىزىمىنە ەنگىزگەن. بيىل تۇڭعىش رەت جابىق عيماراتتا وتەتىن ازيادا ويىندارىنىڭ باعدارلاماسىنا ەنىپ، ءۇش سالماق بويىنشا چەمپيوندار انىقتالدى. ەندى، الداعى ۋاقىتتا جازعى ازيا ويىندارى، ارى قاراي وليمپيادا ويىندارىنىڭ باعدارلاماسىنا ەنگىزۋدى ماقسات ەتىپ وتىرمىز»، - دەدى بوزىمبايەۆ.
ەستەرىڭىزگە سالا كەتەيىك، بۇگىن جالاۋى جەلبىرەگەن قازاق كۇرەسىنەن ءوتىپ جاتقان الەم چەمپيوناتىنا 40 مەملەكەتتەن 166 بالۋان باق سىناپ جاتىر.
اۆتور: كۇنسۇلتان وتارباي
