قانات يسلام الماتىدا مەنني پاكياومەن جۇدىرىقتاسۋى مۇمكىن

 بۇل تۋرالى سپورتشىنىڭ PR مەنەدجەرى بەرىك سۇلتان facebook جەلىسىندەگى پاراقشاسىندا جازدى. - پاكياونىڭ كومانداسى دايىن بولسا QAZAQ كومانداسى دايىن. 22 - ناۋرىز الماتى قالاسى "Almaty arena" سپورت كەشەنىندە بوكس جانكۇيەرلەرى ءۇشىن ۇلكەن شوۋ جاساۋعا ءبىز ساقاداي سايمىز. پاكمەننىڭ كومانداسى كەلىسسە بولدى، - دەپ جازدى.

ايتا كەتەيىك، قانات يسلام سوڭعى كەزدەسۋىن 9 - قىركۇيەك كۇنى ەلوردامىز استانا قالاسىندا وتكىزىپ، كانادالىق برەندون كۋكتى (18-1, 11 ك و) توعىزىنشى راۋندتا تەحنيكالىق نوكاۋتپەن جەڭدى. وسىلايشا وتانداسىمىز WBO NABO جانە WBA Inter- Continental بەلبەۋلەرىن قورعاپ قالعان ەدى. ال فيليپپيندىك بوكسشى سوڭعى رەت 2 - شىلدە كۇنى اۋستراليادا جەكپە- جەك وتكىزىپ، دجەف حورننان جەڭىلگەن ەدى. قانات يسلام مەن مەنني پاكياونىڭ كومانداسى جەكپە- جەك تۋرالى كەلىسىمگە كەلسە، وتانداسىمىز فيليپپيندىك بوكسشىمەن جۇدىرىقتاسقان ەكىنشى قازاق بولادى. مەننيمەن العاش جۇدىرىقتاسقان قازاق بوكسشىسى -  سەرىك ەشماعامبەتوۆ.

سەرىكجان ەشماعامبەتوۆ پەن مەنني پاكياو 2003 -جىلدىڭ ناۋرىز ايىندا جۇدىرىقتاسقان. قازاقستاندىق بوكسشى بۇگىندە الەم تانىعان فيليپپيندىك بوكسشىنىڭ كاسىپقوي رينگتەگى جەتىنشى قارسىلاسى بولعان ەكەن. فيليپپين استاناسى مانيلانىڭ كونە اۋداندارىنىڭ ءبىرى ينترامۋروستا وتكەن جەكپە- جەك بەس راۋندقا دەيىن سوزىلىپ، ءمەننيدىڭ مەرەيى ۇستەم بولعان. دەسە دە سەرىكجان ەشماعامبەتوۆ تە قارسىلاسىنا وڭايلىقپەن جەڭىلمەي، ءبىر رەت سۇلاتىپ تا تۇسىرگەن.

ريزابەك نۇسىپبەك ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى