استانادا تۇركىتانۋعا ارنالعان حالىقارالىق كونفەرەنسيا باستالدى
عىلىمي جيىننىڭ اشىلۋ سالتاناتىن نازاربايەۆ ۋنيۆەرسيتەتىنىڭ پروۆوستى يلەسانمي ادەسيدا اشىپ، كونفەرەنسيا جۇمىسىنا ساتتىلىك تىلەدى، دەپ حابارلايدى twesco.org.
سالتاناتتى راسىمگە وراي تۇركى اكادەمياسى حالىقارالىق ۇيىمىنىڭ (TWESCO) باسشىسى دارحان قىدىرالىنىڭ ارنايى جولداعان قۇتتىقتاۋ حاتىن ۇيىمنىڭ عىلىمي قىزمەتكەرى تيمۋر كوزىريەۆ وقىپ بەردى.
ەكى كۇنگە جالعاساتىن كونفەرەنسيانىڭ نەگىزگى ماقساتى - قازاق ءتىلى مەن تۇركىتانۋدىڭ عىلىمي- تەوريالىق، پەداگوگيكالىق نەگىزدەرىن نىعايتۋ جانە تىلدىك ءبىلىم بەرۋدىڭ ۇزدىك تاجىريبەلەرىن جيناقتاۋ. عىلىمي شاراعا ا ق ش، قازاقستان، ماجارستان، پولشا مەن تۇركيادان كەلگەن عالىمدار مەن ىزدەنۋشىلەر قاتىسۋدا. ۇيىمداستىرۋشىلاردىڭ ايتۋىنشا، ولار ءتىل مەن رۋحاني جاڭعىرۋ ساباقتاستىعىنا بايلانىستى وزەكتى ماسەلەلەردى تالقىلايدى.
