ادۆوكاتتارى قۋاندىق بيشىمبايەۆقا جالا جابىلعانىن مالىمدەدى
قورعاۋشىلارى ءتىپتى وسى جەردە جەمقورلىققا قارسى ۇلتتىق بيۋرونىڭ اقپاراتتارىن دا جوققا شىعاردى. بۇل تۋرالى «ك ت ك» حابارلايدى.
قۋاندىق بيشىمبايەۆتىڭ ادۆوكاتتارى باسپا ءسوز جيىنىن جەمقورلىقپەن كۇرەس قىزمەتكەرلەرىنە قارسى جاۋاپ رەتىندە وتكىزگەن. ويتكەنى، ۇلتتىق بيۋرو دا بۇعان دەيىن جۋرناليستەردى جيناپ، بۇرىڭعى ۇلتتىق ەكونوميكا ءمينيسترىنىڭ اقشانى قالاي ۇرلاپ، پارانى كىمنەن قاشان العانىن ايتقان بولاتىن.
ءبىراق، قورعاۋشىلار مۇنىمەن كەلىسپەي وتىر. نەگىزى بيشىمبايەۆتىڭ ءۇش ادۆوكاتى بار. بىرەۋى شۋلى ءىس بويىنشا اقپارات تاراتپاۋ تۋرالى كەلىسىمگە قول قويعاندىقتان، تەك ەكەۋى عانا ەكس-ءمينيستردى سۇتتەن اق سۋدان تازا ەتىپ كورسەتۋگە تىرىستى. سونداعى ايتقاندارى قۋاندىق بيشىمبايەۆ كىناسىز. ياعني، وعان الدەكىمدەر جالا جاپقان.
«پارامەن ۇستالعان لاۋازىمدى قىزمەتكەرلەر بار. سولار بيشىمبايەۆقا جالا جاۋىپ وتىر. وسى ارقىلى سول كۇدىكتىلەر وزدەرىنىڭ جازاسىن جەڭىلدەتىپ، رەتى كەلسە تۇرمەدەن سىتىلىپ كەتكىسى كەلىپ وتىر»، - دەدى ق. بيشىمبايەۆتىڭ ادۆوكاتى ءمادي مىرزاعارايەۆ.
ءبىراق، وسىلاي دەگەن ادۆوكاتتار ەشكىمنىڭ اتىن اتاپ، ءتۇسىن تۇستەگەن جوق. بارلىعىن سوتتا جاريا ەتەمىز دەپ وتىر. ال، بيشىمبايەۆ قاماۋعا الىنباي تۇرىپ، وسى ءىس بويىنشا ونىڭ قول استىنداعىلارى ۇستالعانى بەلگىلى.
ول «بايتەرەك» DEVELOPMENT"- ءتىڭ بۇرىڭعى ءتوراعاسى باقىت جاقسىبايەۆ، ماجىلىسمەن قابيبوللا جاقىپوۆتىڭ ۇلى اسلان جاقىپوۆ، اتقارۋشى ديرەكتورلار باۋىرجان ايتىمبەتوۆ پەن عازيز ساريەۆ 288 ميلليون تەڭگە پارامەن ۇستالعان. بيشىمبايەۆقا جالا جاپتى دەگەن ادۆوكاتتار وسىلاردى مەڭزەگەن بولۋى ابدەن مۇمكىن.
بۇلار قازىر ەكس-مينيسترمەن بىرگە «نۇرلى جول» باعدارلاماسى بويىنشا ءۇي سالۋعا قۇرىلىس كومپانيالارىنا تەندەردى ۇتىپ بەرگەنى ءۇشىن اۋىزباستىرىق الدى دەپ ايىپتالۋدا.
ادۆوكاتتار مۇنى دا جوققا شىعاردى. ايتۋلارىنشا، بۇل ەشقانداي دا مەملەكەتكە كەلتىرىلگەن شىعىننىڭ وتەۋى ەمەس. ياعني، بۇل اقشانى مەملەكەتكە ەلىمىزدەگى بانكتەردىڭ ءبىرى وتەماقى رەتىندە تولەگەن دەيدى.
ويتكەنى، وسى بانك قىزىلورداداعى شىنى زاۋىتىنىڭ سالىنۋىنا كەپىل بولعان ەكەن. ءىس اياقسىز قالعان سوڭ سول كەپىل بەرگەندەر شىعىندى دا وتەپتى. ءبىر ايتا كەتەرلىگى، ۇلتتىق بيۋرو پارا الىپ، بيۋدجەت اقشاسىن جىمقىردى دەپ شاتىلىپ جاتقان ەكس-مينستر ۇرلانعان اقشاعا جەر الىپ، قوسشى اۋىلىندا ءزاۋلىم كوتتەدجدەر تۇرعىزعان دەگەن ەدى. بيشىمبايەۆقا شاڭ جۋىتپاعان ادۆوكاتتار مۇنى دا جۋىپ- شايدى.
«ول بىرىنشىدەن ءۇي ەمەس اعاشتان سالىنىپ جاتقان قۇرىلىس قانا. ونىڭ كىمدىكى ەكەنىن دالدەمەسىن سوتتا ۇسىنامىز. بيشىمبايەۆتىڭ اتىندا جولداسىنىڭ اتىندا الماتىدا ءبىر جارىم بولمەلى ءۇي مەن استانادا وتباسى تۇرىپ جاتقان ءۇي عانا بار. باسقا دۇنيە-مۇلىك بيشىمبايەۆتىڭ اتىندا جوق»، - دەدى ادۆوكات.
ءبىراق، بيشىمبايەۆتىڭ قىلمىستىق ىسكە قاتىسى بار جوعىن سوت كەلەسى سەيسەنبىدەن باستاپ انىقتاۋى ءتيىس. 350 تومنان تۇراتىن اتىشۋلى ءىس قازىر سوتقا جەتىپ، سۋديالار ماتەريالمەن تانىسۋدا.
ال، ايىپتالۋشى ورىنىندا بيشىمبايەۆ باستاعان باس اياعى 23 ادام. ولاردىڭ 20 سى كىنالارىن مويىنداعان. جىل باسىنان بەرى قاماۋدا وتىرعان ەكس مينيستر بولسا تاعىلعان ايىپتارمەن كەلىسپەي وتىر.
