قازاقستان مەن گولليۆۋد تۇسىرگەن فيلمدەگى امىرەنىڭ اندەرىن قاراعاندىلىق ورىندادى
ساۋندترەك قازىر ا ق ش- تا جازىلىپ جاتىر. فيلمدە 1925-جىلى امىرە قاشاۋبايەۆ پاريج كورەرمەندەرىنىڭ جۇرەگىن جاۋلاپ العان كومپوزيتسيالار بولادى. سەرجان مۇسايىن - قالي بايجانوۆ اتىنداعى قاراعاندى كونسەرتتىك بىرلەستىگىنىڭ جەتەكشى سوليسى، قازاق حالىق اندەرىن ورىنداۋشى ءانشى.
تانىمال قازاق تەنورىنىڭ پاريجدەگى ايرىقشا جەتىستىگى مەن ونىڭ قايعىلى ءومىر جولى تۋرالى فيلمنىڭ ەكى جۇمىس اتاۋى بار: «امىرە» جانە «پاريجدەگى ءان». ول «قازاق فيلم» تاپسىرىسى بويىنشا «Moving» امەريكاندىق كينوستۋديامەن ءتۇسىرىلدى. تۇسىرىلىمگە گولليۆۋدتىق، رەسەيلىك، لاتۆيالىق جانە قازاق كينويندۋستريا ماماندارى قاتىستى.
فيلمنىڭ قويۋشى رەجيسسەرى - دجەفف ۆەسپا، وپەراتور - ماكسيم وسادچي («9 روتا»، «ستالينگراد»). باستى ءرولدى قازاقستاندىق اكتەر سانجار ماديەۆ ورىندايدى، مۇستافا شوقايدىڭ بەينەسىن ەركەبۇلان دايىروۆ سومدايدى. سونىمەن قاتار تۇسىرىلىمگە بريتاندىق اكتەر بەن الدريدج جانە «وبلاست تمى» فيلمى بويىنشا تانىمال بولعان امەريكالىق اكتريسا ەببي كورنيش جۇمىلدىرىلدى.
پروديۋسەرلەر: اليدار وتەمۇراتوۆ، كەري گرانات جانە ەد دجونسون. كارتينا قازاقتىڭ اسىل داۋىسى امىرە قاشاۋبايەۆ ەكسپو شەڭبەرىندە پاريجدە وتكەن دۇنيەجۇزىلىك مۋزىكالىق بايقاۋدا ەۋروپالىق كورەرمەندەردىڭ جۇرەگىن جاۋلاعانى تۋرالى باياندايدى.
درامالىق تەنور الەم بويىنشا ءبىرىنشى بولىپ باتىستا قازاقتىڭ ۆوكالدى-ورىنداۋشىلىق ونەرىن جانە دومبىرا ۇلتتىق اسپابىن تانىستىردى. ءانشى كۇشتى اسەر قالدىرىپ، كۇمىس مەدال جەڭىپ الدى. فيلمنىڭ ءتۇسىرىلىمى ريگادا جانە الماتى قالاسىنىڭ ماڭىندا ءوتتى. ءتۇسىرىلىم وتكەن جىلى اياقتالدى،
قازىر قورىتىندى كەزەڭ - اندەردى جازۋ جۇرگىزىلىپ جاتىر. رەسپۋبليكالىق كاستينگتىڭ قورىتىندىسى بويىنشا امىرەنىڭ كومپوزيتسيالارىن ورىنداۋ قۇرمەتى قاراعاندىلىق ءانشى، پەداگوگ، رەسپۋبليكالىق بايقاۋلار مەن فەستيۆالدەردە جۇلدەرى ورىندار مەن گران-پري يەگەرى اتانعان سەرجان مۇسايىنعا بۇيىردى.
وعان «بالقاديشا»، «ءۇش دوس»، «بەس قاراگەر» جانە «دۋدار-اي» سەكىلدى اندەردى ورىنداۋ كەرەك بولادى. سونىمەن قاتار سەرجان مۇسايىننىڭ داۋىسى كارتينانىڭ كەيبىر ەپيزودتارىندا، باس كەيىپكەر ءان ايتقاندا ەستىلەدى. - مەن ءۇشىن فيلمدە ءدال مەنىڭ داۋىسىم شىعاتىنى ۇلكەن ماڭىزعا يە، - دەپ ءبولىستى سەرجان مۇسايىن.
- قازىر ءبىز «تازا» داۋىستى كادرلاردىڭ ۇستىنە جازىپ جاتىرمىز. قيىندىقتار تۋىندايدى، اسىرەسە دومبىرامەن ءان ايتقانىمدا اكتەردىڭ ارتيكۋلياتسياسىنا ءدال ءتۇسۋ كەرەك كەزدە. قولدىڭ جىلجۋىن سالۋ وتە قيىن بولىپ شىقتى.
سەبەبى ونداي جاعدايدا ءاننىڭ اۋەنى وزگەرەدى. قولدىڭ ءىرى پلاندارى كوپ ەمەس، ءبىراق سونىڭ ءوزى مەنىڭ جۇمىسىمدى كۇردەلى ەتەدى. اكتەردىڭ ارتيكۋلياتسياسىمەن تاماشا بولدى - مۇندا ەش پروبلەما تۋىنداعان جوق. سەرجان مۇسايىن بارىنەن بۇرىن قيىن بولعانى دومبىرامەن ويناۋدى جانە ءان ايتۋدى جازۋ دەيدى. سەبەبى ورىنداۋشىلار دومبىرامەن ءان ايتۋ بارىسىندا يمپروۆيزاتسيالايدى.
- مەن ونىڭ بارلىعىن قيىن بولسا دا، دۇرىس جاساي الدىم دەپ ويلايمىن. دىبىس رەجيسسەرلەرى العاش رەت ءفيلمدى دىبىستاعان ادام ءۇشىن اتقارىلعان جۇمىس تاماشا دەدى. دەگەنمەن امەريكاندىقتار ماقتاۋدا الدارىنا جان سالمايدى دەپ ويلايمىن. جۇمىس ءالى اياقتالعان جوق. ناتيجەسىنە كورەرمەندەر باعا بەرەدى دەپ ويلايمىن». فيلمدى تۇسىرۋشىلەر ونى ۇلكەن ەكراندارعا وسى جىلى شىعارۋدى جوسپارلاپ وتىر.
