اكۋلادان قاشقان بريتانيالىق جەتى شاقىرىم ءجۇزىپ وتكەن
ءبىراق ونىڭ سوزىنە قاراعاندا، مۇحيت تورپەدوسى دجونعا شابۋىلداماعان.
بۇل جايلى BBC حابارلادى.
34 جاستاعى بريتانيالىقتىڭ سۋعا سەكىرگەن ياحتاسى جاعالاۋدان 7,5 شاقىرىمعا الىستاپ كەتىپ، شارك («اكۋلالار ءمۇيىسى») شىعاناعىنا بارىپ توقتاعان. تاجىريبەلى دايۆينگشى سۋ بەتىنە كوتەرىلگەندە ياحتاسى ماڭايدا بولماعان. داۋىستاپ كومەككە شاقىرعان ول، قاسىنا اكۋلانىڭ جاقىنداپ كەلە جاتقانىن كورگەن.
«ول ماعان وتە جاقىن كەلدى، مەنى قىزىقتاعانداي اينالشىقتاپ ءجۇزىپ ءجۇردى. اكۋلا مەنىڭ كىم ەكەنىمدى، مەنى جەۋگە بولا ما، جوق پا، انىقتاپ الماق بولعان سەكىلدى. ءتورت مەترلىك اكۋلامەن بەتپە-بەت كەلگەن سوڭ، وسى جەردە كۇنىم ءبىتتى دەپ ويلادىم»، - دەيدى كرەيگ.
ۇرەيدەن زارەسى ۇشقان بريتانيالىق اقىرىنداپ جاعالاۋعا قاراي جۇزە باستايدى. ون بەس مينۋتتاي ارتىنان ەرىپ وتىرعان اكۋلا دجونعا شابۋىل جاساماعان.
«ءجۇزىپ كەلە جاتىپ، ارتىما قاراسام، اياعىما تيەر-تيمەس جەردە اكۋلانىڭ تۇمسىعى كەلە جاتتى»، - دەيدى ول.
دەگەنمەن مۇحيت جىرتقىشى دجونعا تيىسپەگەن. ءۇش ساعاتتاي جۇزگەن دايۆينگشى جاعالاۋعا امان-ەسەن جەتەدى.
جارتى ساعاتتان كەيىن ونى اۋەدەگى تىكۇشاقتار بايقاعان، تاعى ازداعان ۋاقىتتان سوڭ ونىڭ جانىنا قۇتقارۋشىلار جەتكەن.
«وسىنشاما قىسقا ۋاقىتتا جەتى جارىم شاقىرىم جۇزۋگە بولادى دەپ بىرەۋ ايتسا سەنبەس ەدىم، ءبىراق ارتىڭنان اكۋلا اڭدىپ وتىرسا، (...) باپكەردىڭ قاجەتى دە جوق شىعار»، - دەيدى قۇتقارۋشى گلەنن ريدجلي.
