قازاقستان پرەمەر-ليگاسى تاريحىنداعى ەڭ جىلدام گول سوعىلدى - كەسكىن

ەل پرەمەر-ليگاسىنىڭ جاڭا رەكوردى 22- قازاندا وتكەن «توبىل» مەن «وقجەتپەس» كوماندالارى اراسىنداعى ويىندا تىركەلدى.

قوستانايلىق كلۋبتىڭ شابۋىلشىسى جاسۇلان مولداقارايەۆ قوناقتار قاقپاسىنا بار بولعانى 10 سەكۋندتىڭ ىشىندە گول سوعىپ ۇلگەردى. وسىعان دەيىن قازاقستان پرەمەر-ليگاسى تاريحىنداعى ەڭ جىلدام گول كورسەتكىشىن الەكساندر گەينريح پەن سەرگەي شافف ەنشىلەرىنە جازىپ كەلگەن ەدى.

2015-جىلى الەكساندر «توبىل» قاقپاسىنا، 2017-جىلى سەرگەي «اقتوبە» قاقپاسىنا 18 سەكۋندتا گول سوققان بولاتىن. ەڭ جىلدام گول سوعىلعان ويىندا «توبىل» «وقجەتپەستى» 4:1 ەسەبىمەن ۇتتى.

ايتا كەتەيىك، قازىرگى تاڭدا الەمدەگى ەڭ جىلدام سوعىلعان گولدار سانى بىرنەشەۋ. ولاردىڭ بارلىعى دا تورەشى ىسقىرىعى شالىنىسىمەن، الاڭ ورتاسىنان باعىتتالىپ، ناتيجەلى اياقتالعان.

ءبىراق، ونىڭ بىرەۋى عانا گيننەستىڭ رەكوردتار كىتابىنا ەنگەن. ول گولدى ارگەنتينالىق فۋتبولشى ريكاردو وليۆەيرا سوققان.

ونىڭ ەسىمى جازىلعان رەكورد 1998-جىلى تىركەلگەن. ارگەنتينانىڭ «سوريانو» كومانداسىنىڭ ويىنشىسى جەرگىلىكتى «ريو-نەگرو» قاقپاسىنا 2,8 سەكۋندتا گول سوققان. ازىرگە دەيىن بۇل رەكوردقا تۇزەتۋ ەنگىزىلگەن جوق.

2009-جىلى ساۋد ارابياسىندا فۋتبول تاريحىنداعى ەڭ جىلدام گول سوعىلدى. ناۆاف ءال ابەد ەسىمدى شابۋىلشى ويىن باستالعانىنا 2 سەكۋند وتپەستەن تابلوداعى ەسەپكە وزگەرتۋ ەنگىزگەن.

ءبىراق، بۇل ناتيجە دە رەكورد رەتىندە ەسەپكە الىنبادى. سەبەبى، الاڭعا شىققان بارلىق ويىنشىلاردىڭ جاسى 23 تەن اسپاعان ەكەن.

ناتيجەسىندە ناۆاف ءال ابەدتىڭ گولى بەيرەسمي تۇردە، الەمدەگى ەڭ جىلدام سوعىلعان گول رەتىندە ەل ەسىندە قالدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى