بالالار اراسىنداعى العاشقى پاراليمپيادالىق ويىنداردىڭ جەڭىمپازدارى بەلگىلى بولدى
ق ر تۇڭعىش پرەزيدەنتى قورى ۇيىتقى بولعان پاراليمپيادالىق ويىنداردى وتكىزۋدىڭ باستى ماقساتى اداپتيۆتى دەنە تاربيەسىن تانىمال ەتۋ جانە دامىتۋ، ينكليۋزيۆتى ءبىلىم بەرۋ سالاسىنداعى جاڭا كوممۋنيكاتسيالىق شەشىمدەردى دامىتۋ، ەرەكشە قاجەتتىلىكتەرى بار دارىندى بالالاردى انىقتاۋ جانە ءاربىر قاتىسۋشى بالانىڭ دامۋىنا ىقپال ەتۋ بولىپ تابىلادى.
قاناتقاقتى جوبا اياسىنداعى پاراليمپيادا ويىندارىنا ەلىمىزدىڭ اقمولا، الماتى، قوستاناي، پاۆلودار وبلىستارى مەن استانا قالاسىنان 120 سپورتشى قاتىستى. 12 دەن18 جاستاعى ورەندەر سپورتتىڭ 5 ءتۇرى بويىنشا باقتارىن سىناعان بولاتىن.
بۇل: ۆولەيبول، شاحمات، قوڭىراۋمەن جۇگىرۋ، ءجۇزۋ جانە اربادا تاڭىلعاندار اراسىندا جۇرگىزىلەتىن ءبي سايىستارى. وسىلايشا ءجۇزۋ جارىسىندا ءۇشىنشى ورىنعا ەرنۇر جولاشار (استانا قالاسى)، ەكىنشى ورىنعا ادىلەت جۇرگەنوۆ (اقتوبە وبلىسى) يە بولدى. ال ءبىرىنشى ورىن ۆلاديسلاۆ نيناحانوۆقا (قوستاناي وبلىسى) بۇيىردى.
شاحماتتان قولا جۇلدەنى نابي دياس (الماتى وبلىسى)، كۇمىس جۇلدەنى ارايلىم ساعيەۆا (اقتوبە وبلىسى) قاناعات تۇتسا، التىن جۇلدەنى سۇلتان قوجاحمەتوۆ ەنشىلەدى. ارباداعى ءبي سايىسىندا ءۇشىنشى ورىندى لەستين اسلامبەكوۆ پەن ديانا مۇساعۇلوۆا، ەكىنشى ورىندى تاڭاتحانوۆ باعدات پەن جانسۇلۋ كۇزەنبايەۆا (قوستاناي وبلىسى) الدى.
ال ەرلان نۇرماعانبەتوۆ پەن ساندۋعاش اقانوۆا اتالمىش سايىستا توپ جاردى. قوڭىراۋمەن جۇگىرۋ جارىسىندا نادەجدا كوحانەنكو (قوستاناي وبلىسى) مەن ايا حامزينا (الماتى وبلىسى) ءۇشىنشى ورىندى ءوزارا بولىسسە، ەكىنشى ورىندى ديليارا اساينوۆا (پاۆلودار وبلىسى) يەلەنگەن بولاتىن.
ال ۆالەريا گاۆريلينا (استانا قالاسى) مارە سىزىعىنا بارىنەن بۇرىن جەتىپ، التىن مەدالدى قانجىعاسىنا بايلادى.
ال ۆولەيبولدان كوماندالىق ەسەپتە ءۇشىنشى ورىن استانا قالاسىنىڭ كومانداسىنا، ەكىنشى ورىن اقتوبە وبلىسىنىڭ كومانداسىنا بۇيىردى.
ال جەڭىس تۇعىرىنان اتالمىش جارىستا پاۆلودار وبلىسىنىڭ كومانداسى كورىندى.
ايتا كەتۋ كەرەك، اتالمىش سپورت تۇرلەرىنەن پاراليمپيادالىق ويىندار كەلەسى جىلدان باستاپ ءداستۇرلى تۇردە رەسپۋبليكا دەڭگەيىندە وتكىزىلەدى دەپ جوپارلانۋدا.
