قازاقستاننىڭ بارلىق قالالارىندا «عىلىمعا قىزمەت كورسەتۋ ورتالىقتارى» اشىلادى

بۇل تۋرالى ق ر ب ع م ۆيتسە-ءمينيسترى اسلانبەك امرين استانادا «عىلىم مەن بيزنەستى بىرىكتىرۋ قۇرالى رەتىندە تەحنولوگيالاردى كوممەرتسيالاندىرۋ» فورۋمىندا ءمالىم ەتتى، دەپ حابارلايدى «قازاقپارات» ح ا ا ءتىلشىسى.

ۆيتسە-مينيستر ءوز سوزىندە قازاقستاندىق عىلىمعا تىڭ تىنىس بەرۋ ءۇشىن ق ر ب ع م ناقتى ىسكە كوشكەنىن اتاپ ءوتتى.

«ءبىز بارلىق بيزنەس جوبالاردى ساراپتاي وتىرىپ، بارشا وتىنىمدەر مەن شاعىمداردى زەرتتەي كەلە، نەگىزگى ماسەلە - ءوزىمنىڭ ءسوزىم بويىنشا كەلتىرگەندە «ساڭىراۋ تەلەفوندا» دەپ ويلايمىن. دەمەك، بۇل ءبىر-ءبىرىمىزدى تۇسىنبەۋدىڭ كەسەلى. قانداي شەشىمدى ۇسىنامىز. ءبىز 2018-جىلى مەملەكەتتىك - ساراپتامالىق ورتالىعى مەن ونىڭ بارلىق فيليالىنىڭ بازاسى بويىنشا عىلىمعا قىزمەت كورسەتۋ ورتالىعىن اشۋدى جوسپارلاپ وتىرمىز، - دەيدى اسلانبەك امرين.

ۆيتسە-مينيستر ءوز سوزىندە ورتالىق ارقىلى عالىمدار حالىقارالىق بازالارعا ەنىپ، گرانتتارعا ءوتىنىم بەرۋ تۇرعىسىنان كاسىبي كەڭەس الا الاتىنىن ايتادى. «سونداي-اق، ورتالىقتا عىلىمي ماقالالاردى كاسىبي تۇرعىدا جاريالاۋدىڭ جولدارىن كورسەتۋ، جوبالاردى كوممەرتسيالاندىرۋ بويىنشا ماركەتينگتىك قولداۋ، عىلىمي اقپاراتتاردى تاڭداۋ مەن ساراپتاۋ تۇرعىسىنداعى تەرەڭ تالداۋ، عالىمدار ءۇشىن ءى ت- تەحنولوگيالار مەن جاڭا قىزمەتتەردى تانىستىرۋ قىزمەتتەرى كورسەتىلەدى. عالىمدارعا بۇل ءۇشىن استانا نەمەسە الماتىعا بارۋ مىندەتتى ەمەس. وزگە دە قالالارداعى فيليالدار عالىمدار ءۇشىن اشىلادى»، - دەيدى ول.

ەسكە سالا كەتسەك، بۇگىن استانادا «عىلىم مەن بيزنەستى بىرىكتىرۋ قۇرالى رەتىندە تەحنولوگيالاردى كوممەرتسيالاندىرۋ» تاقىرىبىندا فورۋم ءوتىپ جاتىر. فورۋمعا قاتىسۋشىلار عىلىمي جانە عىلىمي-تەحنيكالىق قىزمەت ناتيجەلەرىنىڭ دامۋىنداعى وزەكتى ماسەلەلەردى تالقىلاپ، عىلىم مەن بيزنەستىڭ قارىم-قاتىناسىن تاجىريبە جۇزىندە ىسكە اسىرۋ جولدارىن قاراستىرۋدا.

اۆتور: ايان بەكەن ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى