قازاقستاندىق وقۋشىلار ءوز پرەزيدەنتتەرىن سايلايتىن بولادى
مۇنداي ۇسىنىستى قاراعاندىعا جاساعان ساپارى بارىسىندا ق ر و س ك ءتوراعاسىنىڭ ورىنباسارى كونستانتين پەتروۆ جاسادى، دەپ حابارلايدى قازاقپارات قاراعاندى وبلىسى اكىمدىگىنىڭ باسپا ءسوز قىزمەتىنە سىلتەمە جاساپ.
سايلاۋدىڭ مۇنداي ءتۇرى ازىرگە پيلوتتىق رەجىمدە استانا قالاسىندا عانا ەنگىزىلگەن جانە دە ول ءوز ناتيجەسىن كورسەتۋدە. ماسەلەن، مەكتەپ پرەزيدەنتتىگىنە ۇمىتكەر ەلوردالىق وقۋشىلار ءوز كانديداتۋرالارىن ۇسىنعاننان كەيىن، سايلاۋالدى جارىستار وتكىزەدى.
ياعني ناسيحات پاراقشالارىن تاراتادى، باعدارلامالار قۇرادى، داۋىس بەرۋشىلەردى بارىنشا جۇمىلدىرۋعا تىرىسادى. سايلاۋدان ءبىر كۇن بۇرىن، ادەتتەگىدەي «تىنىشتىق كۇنى» جاريالانادى، ال سايلاۋدىڭ ءوزى شىنايى فورماتقا مەيلىنشە جاقىن وتەدى - داۋىس بەرۋ كابينالارى، بيۋللەتەندەر، سايلاۋ كوميسسياسى جانە باقىلاۋشىلار بولادى.
«مەكتەپ پرەزيدەنتتەرىن سايلاۋ بۇرىندارى دا بولعان، الايدا ءار مەكتەپ ونى ءوز بەتىنشە وتكىزىپ وتىرعان. قازىر ءبىز ءبىلىم مينيسترلىگىنە قازاقستان رەسپۋبليكاسىنىڭ سايلاۋ تۋرالى زاڭىنىڭ نەگىزىندە قۇرالعان وسىنداي ءبىرىڭعاي فورماتتى ۇسىنىپ وتىرمىز. بۇل مەكتەپ وقۋشىلارىندا وزدەرىنىڭ ازاماتتىق پوزيتسيالارىن ۇستانۋعا قىزىعۋشىلىقتى وياتىپ، ولاردى داۋىس بەرۋگە ۇيرەتەدى جانە دەموكراتيانىڭ نەگىزگى پرينتسيپتەرىن ءىس جۇزىندە كورسەتۋگە مۇمكىندىك بەرەدى دەپ ويلايمىز»، - دەيدى كونستانتين پەتروۆ.
قاراعاندى مەكتەپتەرىندە دە «ەرەسەكتەر» ەرەجەسى بويىنشا سايلاۋ وتكىزۋ ۇسىنىسى جاسالدى. ەگەر بۇل تاجىريبە ءساتتى بولسا، وندا ءوز پرەزيدەنتى ءۇشىن وبلىستىڭ بارلىق وقۋشىلارى داۋىس بەرەتىن بولادى.
