سيريا داعدارىسى بويىنشا استانا پروتسەسىنىڭ كەلەسى كەزدەسۋى قاشان وتەتىنى بەلگىلى بولدى

ق ر س ءى م حابارلاماسىنا سايكەس، ۇرىس ءىس-قيمىلدارىن توقتاتۋ رەجيمىنە كەپىلگەر ەلدەردىڭ ءوزارا كەلىسۋىمەن، استانا پروتسەسى اياسىنداعى سيريا جونىندە جوعارى دەڭگەيدەگى جەتىنشى حالىقارالىق كەزدەسۋ 2017-جىلى 30-31- قازاندا وتەدى.

«كەلىسسوزدەر بارىسىندا تۇتقىنداردى، قاماۋدا وتىرعانداردى بوساتۋ، قازا تاپقانداردىڭ دەنەلەرىن بەرۋ جانە ءىز-ءتۇزسىز جوعالعانداردى ىزدەستىرۋ بويىنشا جۇمىس توبىنىڭ ەرەجەسىن بەكىتۋ جوسپارلانۋدا. سونداي-اق، تاراپتار حالىقارالىق تەرروريزممەن كۇرەس ماسەلەلەرىن قاراستىرۋعا جانە سيريادا گۋمانيتارلىق مينادان تازارتۋ جۇمىستارىن جۇرگىزۋ تۋرالى بىرلەسكەن مالىمدەمەنى قابىلداۋعا نيەتتى. ءوزارا قىزىعۋشىلىق تۋدىراتىن باسقا دا ماسەلەلەردىڭ تالقىلانۋى ىقتيمال»، - دەلىنگەن حابارلامادا.

ق ر س ءى م رەسمي سايتىنان حابارلانعانداي، استانادا قىركۇيەكتە وتكەن كەلىسسوزدەردىڭ التىنشى راۋندى تاراپتاردىڭ سيريادا دەەسكالاتسيا ايماقتارىن قۇرۋ تۋرالى مەموراندۋم ەرەجەلەرىن ىسكە اسىرۋىمەن اياقتالعان. سونداي-اق، كەزدەسۋدە استانا پروتسەسى اياسىندا وسىعان دەيىن قابىلدانعان باسقا دا شەشىمدەردىڭ ورىندالۋى بويىنشا جۇمىستى جالعاستىرۋ نيەتى راستالعان بىرلەسكەن مالىمدەمەنى قابىلدانعان.

سيريادا قۇرىلعان دەەسكالاتسيا ايماقتارى اتالعان قاقتىعىستىڭ كولەمىن ەداۋىر تومەندەتىپ سيرياداعى گۋمانيتارلىق جاعدايدى جاقسارتۋعا مۇمكىندىك بەرىپ وتىر.

اۆتور: ايان بەكەن ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى