شىمكەنتتىڭ اكىمى قوعامدىق كولىكپەن ءجۇرىپ، كوپتەگەن ماسەلەنىڭ بەتىن اشتى
عابيدوللا ءابدىراحىموۆ ەسكىرگەن ايالدامالاردى جاڭارتىپ، جولاۋشىنى ايقايلاپ شاقىراتىن كوندۋكتورلارعا شارا قولدانۋدى تاپسىردى، دەپ حابارلايدى قازاقپارات ءتىلشىسى.
شاھار باسشىسىنىڭ سوزىنشە، جولاۋشىلار تاسىمالىندا تارتىپكە كونبەگەندەردى جازالۋ قاجەت. بيۋدجەتتەن قاجەتتى قاراجات ءبولىپ، توزىعى جەتكەن ايالدامالاردى مەملەكەت مەنشىگىنە قايتارۋ كەرەك. وتكەن جىلى شىمكەنتتى «لاس- ۆەگاسقا اينالدىرامىن» دەپ كۇللى جۇرتتى اۋزىنا قاراتقان عابيدوللا راحماتوللا ۇلى وسىلايشا قوعامدىق كولىكتەر جۇمىسىن رەتكە كەلتىرۋگە شىنداپ كىرىسكەن سىڭايلى.
ونىڭ سوزىنشە، حالىق سانى ميلليونعا جۋىقتاعان قالانىڭ ايالدامالارىندا شەتەلدەگىدەي شاھاردىڭ كارتاسى مەن قاي باعىتتا اۆتوبۋستار قاتىنايتىنىن بىلدىرەتىن كەستە جوق. سوندىقتان بۇل ولقىلىقتى رەتكە كەلتىرۋ ءبولىم باسشىلارىنا تاپسىرىلدى. ول ءۇشىن اكىم جاۋاپتىلارعا ەكى اي ۋاقىت بەردى. سونداي-اق، ءاربىر ايالداماعا اۆتوبۋستىڭ جاقىنداعانىن بىلدىرەتىن قۇرىلعى ورناتۋى كەرەكتىگىن اتاپ ءوتتى.
«بۇل جوبا جۇزەگە اسسا، تۇرعىندار سمارتفوننىڭ كومەگىمەن قوعامدىق كولىكتىڭ قوزعالىسىن باقىلاي الادى»، - دەدى اكىم.
جيىندا قالالىق جولاۋشىلار كولىگى جانە اۆتوموبيل جولدارى ءبولىمىنىڭ باسشىسى قۋاتجان جۇماتايەۆ جولاۋشىلار تاسىمالدايتىن كومپانيا باسشىلارى دا جەكە كولىكتەرىن تاستاپ، وزدەرى قىزمەت ەتەتىن باعىتتاردا اۆتوبۋسپەن جۇرگەنىن ايتتى. ناتيجەسىندە ولار دا جۇمىس بارىسىنداعى كەمشىلىكتەردى انىقتاۋدا ەكەن.
