سولتۇستىك وڭىرلەرگە قونىس اۋدارعاندار تۇراقتى جۇمىسپەن قامتىلادى

 «بۇگىنگى تاڭدا وڭتۇستىك قازاقستان، الماتى، جامبىل،  قىزىلوردا، ماڭعىستاۋ سياقتى جۇمىس كۇشى ارتىق وبلىستاردان شىعىس قازاقستان، سولتۇستىك قازاقستان، پاۆلودار، قوستاناي سىندى ەڭبەك قولى تاپشى وڭىرلەرگە 1324 ادام قونىس اۋداردى. وسىلايشا، جۇمىس ىزدەگەن 335 وتباسى وڭتۇستىك ولكەلەردەن سولتۇستىك ايماقتارعا ەرىكتى تۇردە كوش تۇزەدى. جاڭا مەكەنگە قونىستانعان ەڭبەككە قابىلەتتى ازاماتتار تۇراقتى جۇمىس ورىندارىنا تۇرعىزىلادى. ەرىكتى كوشتى قولداۋعا ارنالعان مەملەكەت كومەگىنە وتباسىنىڭ ءار مۇشەسىنە ارنالعان 35 ايلىق ەسەپتىك كورسەتكىش كولەمىندەگى كوشى- قون سۋبسيدياسى، ءبىر جىل جۇزىندە اي سايىن بەرىلەتىن 15-30 ايلىق ەسەپتىك كورسەتكىش سيپاتىنداعى باسپانا جالداۋ مەن كوممۋنالدىق قىزمەتتەردى تولەۋ قارجىسى كىرەدى»، - دەپ اتاپ وتىلگەن مينيسترلىك مالىمەتىندە.

 ەسكە سالا كەتسەك، ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋ باعدارلاماسى اياسىندا ەڭبەك رەسۋرستارىنىڭ ۇتقىرلىعىن ارتتىرۋ ماقساتىندا، ۇكىمەت كوش شىعاتىن جانە ونى قابىلدايتىن وڭىرلەردى، قونىس اۋدارۋشىلاردى قولداۋعا قاجەت الەۋمەتتىك كومەك تۇرلەرىن انىقتادى. كوش ەرىكتى تۇردە جانە مىندەتتى تۇردە جۇمىس بەرۋشى تاراپتا بوس جۇمىس ورىندارى بولعاندا عانا قولعا الىنادى. وسى ورايدا كوشتى قابىلدايتىن جاق حالىقتى جۇمىسپەن قامتۋ ورتالىعىنا قانداي ماماندىقتار جونىندە قوسىمشا ەڭبەك كۇشى كەرەكتىگىن، قويىلاتىن تالاپتار مەن شارتتار تۋرالى اقپاراتتى جەتكىزۋى ءتيىس. بەلگىلى ءبىر بىلىكتىلىگى جوق قونىس اۋدارۋشى ازاماتتارعا قىسقا مەرزىمدى وقۋدان ءوتىپ، جۇمىسشى ماماندىقتى مەڭگەرۋگە مۇمكىندىك قامتاماسىز ەتىلەدى.

 «باعدارلامانىڭ اتالعان باعىتىن جۇزەگە اسىرۋ ارقىلى ەڭبەك رەسۋرستارىنىڭ قوزعالىسى جاندانىپ، ازاماتتاردىڭ ەكونوميكا سۇرانىسىنا ساي ۇتىمدى ورنالاسۋى قامتاماسىز ەتىلەدى»، - دەلىنگەن ۆەدومستۆو حابارلاماسىندا.

 اۆتور: رۋسلان عابباسوۆ

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى