ءالىپبي وزگەرتۋ تەك كيريلليتسا ارىپتەرىن لاتىنمەن الماستىرۋ عانا ەمەس - سەناتور
بۇگىن پارلامەنت ماجىلىسىندەگى «مەملەكەتتىك ءتىلدىڭ لاتىن گرافيكاسىنداعى ءالىپبيىنىڭ ءبىرىڭعاي ستاندارتىن ەنگىزۋ ماسەلەلەرى تۋرالى» پارلامەنتتىك تىڭداۋدا سەنات دەپۋتاتى تولەۋبەك مۇقاشەۆ وسىلاي ءمالىم ەتتى، دەپ حابارلايدى قازاقپارات.
«جازبانى وزگەرتۋدىڭ جاعىمدى تۇستارى بار. اتاپ ايتقاندا ءوز ەرەكشەلىگىمىزدى ساقتاپ قالۋ، الەمدىك ينتەگراتسيا، اقپارات الۋ مۇمكىندىكتەرىن دامىتۋعا جاعداي بار. لاتىن ءالىپبيى الەمدە تانىمالدىققا يە. بىرىنشىدەن، لاتىن ءالىپبيىنىڭ ارقاسىندا جاستارىمىزدىڭ عالامتوردان اقپارات الۋعا كوپتەگەن مۇمكىندىكتەرى، ءبىلىم مەن عىلىم سالاسىنداعى كەڭىستىككە، تەز اراداعى وقۋعا قولجەتىمدىلىك بولادى. ەكىنشىدەن، تۇركى الەمى مەن قازاقستاننىڭ بىرىگۋىنە ىقپال ەتەدى. تۇركيا، ازەربايجان، وزبەكستان، تۇرىكمەنستان سياقتى ەلدەرمەن ورتاق جازباعا يە بولۋى ءبىزدىڭ ەلىمىز ءۇشىن پايدالى. لاتىن الىپبيىنە ءوتۋ قازاق ءتىلىنىڭ مەملەكەتتىك ءتىل رەتىندەگى مارتەبەسىن كوتەرۋگە ىقپالى زور. سەبەبى ءبىزدىڭ ءتىلىمىز باسقا تىلدەرىمەن بىردەي دەڭگەيدە تۇرادى جانە وزگە قارىم- قاتىناس جاساۋعا جەڭىل بولادى. ءالىپبي اۋىستىرۋدىڭ ساياساتقا دا، باسقاعا دا قاتىسى جوق. ەڭ باستى قاجەتتىلىگىن ءتىلدىڭ ءوزى تالاپ ەتىپ وتىر»، - دەدى سەناتور.
وسى ورايدا ول ءتىلدىڭ ىشكى ءارى سىرتقى جاعدايى قازىرگى جازۋدىڭ ورفوگرافياعا، ايتىلۋدا ورفوەپياعا كەرى اسەر ەتىپ، وزگە تىلدەن كىرگەن سوزدەردىڭ سالماعى ارتا ءتۇسىپ، كىرمە دىبىستاردىڭ ءتول سوزدەرىمىزدىڭ فونەتيكالىق، گرامماتيكالىق تالاپتارىن بۇزا باستاۋى سەكىلدى ءتۇرلى جاعدايلار ءالىپبي وزگەرتۋ ماسەلەسىن العا تارتقاندىعىن اتاپ ءوتتى.
«دەمەك، ءالىپبي وزگەرتۋ تەك كيريلليتسا ارىپتەرىن لاتىنمەن الماستىرۋ عانا ەمەس، جازۋ سالاسىندا دا رەفورما قايتا جاساۋ قاجەتتىگىن تالاپ ەتەدى. الەمنىڭ وزىق ەلدەرى يگىلىگىن كورىپ، كوپشىلىگى قولداپ وتىرعان لاتىن الىپبيىنە ءبىزدىڭ دە كوشكەنىمىز دۇرىس دەپ ويلايمىن. قازىرگى تاڭدا لاتىن ءالىپبيى ۇلكەن بەدەلگە يە بولىپ، قولدانىس اياسى دا مۇمكىندىگى زور ەكەندىگىن تانىتىپ وتىر»، - دەدى ت. مۇقاشەۆ.
