تۇرىكمەنستان قازاقستانمەن شەكارانى ۋاقىتشا جاپتى
ازيا ويىندار 17 - قىركۇيەكتە باستالىپ، 10 كۇنگە جالعاسالى. سوندىقتان 27 - قىركۇيەككە دەيىن رەسپۋبليكاعا وڭايلاتىلعان تارتىپتە، ياعني ۆيزاسىز كەلەتىن شەتەلدىك ازاماتتار ءۇشىن تۇرىكمەنستان اۋماعىنا كىرۋ ۋاقىتشا جابىلدى.
«شەكارا اعىمداعى جىلدىڭ 27 - قىركۇيەگىنە دەيىن جابىق. وزدەرىڭىز بىلەتىندەي، تۇرىكمەنستانعا وڭايلاتىلعان تارتىپپەن كەلۋدى بۇرىن جاسالعان كەلىسىمدەرگە سايكەس، ماڭعىستاۋ وبلىسىندا تۇراتىن ق ر ازاماتتارى قولدانىپ كەلدى. ولار تۇرىكمەنستاننىڭ بالقان ءۋالاياتى اۋماعىنا ۆيزاسىز 5 تاۋلىككە دەيىن كەلىپ، كەتىپ ءجۇردى»، - دەدى ماڭعىستاۋ وبلىستىق مەملەكەتتىك كىرىستەر دەپارتامەنتىنىڭ باس مامانى ماقسات اقمۇراتوۆ.
ونىڭ ايتۋىنشا، قازاقستان ازاماتتارىنىڭ تۇرعىلىقتى جەرى جەكە كۋالىكتە (ءتولقۇجاتتا) جازىلعان تىركەلۋ بەلگىسى نەگىزىندە انىقتالادى. قازىرگى تاڭدا قازاقستان- تۇرىكمەنستان شەكاراسىندا «تەمىر- بابا» اۆتوموبيل وتكىزۋ بەكەتى ورنالاسقان. ول جەردە وسىلاي اتالاتىن، سونداي- اق «بولاشاق» تەمىرجول شەكارا بەكەتتەرى بار.
