توقتىلاردىڭ بارلىعى بىردەي قۇرباندىققا شالىنبايدى - يمام

بۇل جونىندە تالدىقورعان قالاسىنداعى «يمان» ورتالىق مەشىتىنىڭ باس يمامى سەرىكحان ىرىمحان ۇلى ءمالىم ەتتى.

ونىڭ سوزىنشە، قۇرباندىققا شالىناتىن توقتى كەم دەگەندە التى ايدان اسقان جانە ءىرى بولۋى شارت. ال ءىرى قارا بولسا ەكى جاسقا تولعان بولۋى كەرەك. جانە سويىلاتىن مالدىڭ كوزىن بايلاۋ قاجەت.

«مالدى سويۋعا كىرگىزگەن كەزدە ونىڭ كوزىن بايلاۋ قاجەت. ويتكەنى ءبىز عىلىمي تۇردە جاقسى بىلەمىز. مال تىتىركەنىپ، شوشىپ قالسا، ونىڭ قانى تولىق اقپايدى. ال قانى تولىق اقپاعان مال ادامدى اۋرۋعا شالدىقتىرۋى مۇمكىن. ءبىزدىڭ تالدىقورعان قالاسىنىڭ وزىندە «نۇر»، «يمان»، «جەتىسۋ» جانە «ەركىن» مەشىتىندە قۇربان شالاتىن جەرلەر دايىندالىپ جاتىر.

ول جەردە قۇربان شالاتىن ادامداردى ارنايى كۋرستاردان وتكىزدىك. ولاردىڭ ءدىني مىنەز - قۇلقى دۇرىس بولۋى كەرەك.  ايتاتىن دۇعالارىن ءبىلۋى كەرەك. جانە بۇل قاساپشىلاردىڭ قىزمەتىن تەگىن جاسايمىز دەپ جوسپارلاپ وتىرمىز»، - دەيدى سەرىكحان ىرىمحان ۇلى.

سونداي-اق ول جاعدايى كەلگەن ءار ءبىر مۇسىلمان قۇرباندىق شالۋعا مىندەتتى ەكەنىن ايتادى. ماسەلەن 85 گر التىنى نە بولماسا وسى التىنعا تەڭ اقشاسى بار ادام قۇرباندىق شالۋى كەرەك.

ال قارىزى كوپ، جاعدايى جوق جانداردىڭ قۇرباندىق شالۋى مىندەت ەمەس. جالپى بۇگىنگى تاڭدا تالدىقورعان جەرىندە مالداردىڭ باعاسى اسا شارىقتاي قويعان جوق.

ماسەلەن، قويدىڭ باعاسى 20 مىڭنان 32 مىڭ تەڭگە ارالىعىندا. ساتۋشىلار ساۋدالاسۋعا دا دايىن ەكەندىكتەرىن ايتادى. بۇل كۇندەرى 70 تاكسي قالا تۇرعىندارىن تەگىن تاسىمالدايتىن بولادى. سونداي- اق ءتۇرلى شارالار دا ۇيىمداستىرىلماق.

اۆتور: سامال قابىشەۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى