قازىبەك ءبيدىڭ جولىمەن ءجۇرىپ وتەتىن حالىقارالىق اۆتوكەرۋەن وڭتۇستىك وڭىرگە جەتتى
«قاز داۋىستى قازىبەك ءبي: بابالارعا تاعزىم» حالىقارالىق اۆتوكەرۋەنى كۇنگەيدەگى كونە قالالاردى ارالادى، دەپ حابارلايدى «قازاقپارات» ح ا ا ءتىلشىسى.
ەلباسى ن. ءا. نازاربايەۆتىڭ «بولاشاققا باعدار: رۋحاني جاڭعىرۋ» ماقالاسىن ىسكە اسىرۋ اياسىندا سارىارقا توسىنەن كەلگەن اۆتوكەرۋەنىڭ وڭتۇستىككە ات باسىن بۇرۋى دا بەكەر ەمەس. سەبەبى، قازىبەك بابامىز ۇلتتىق پانتەونعا اينالعان قوجا احمەت ياساۋي كەسەنەسىندە جەرلەنگەنى بەلگىلى. ال ول كەسەنەگە بارماس بۇرىن، ونىڭ ۇستازى ارىستان بابقا زيارات ەتۋ بۇلجىماس شارتقا اينالعان. وسى جولدى ۇستانعان مارتەبەلى مەيماندار، الدىمەن ات باسىن وتىرار اۋدانىنا بۇردى. اۋدان اكىمى ەرلان ايتاحانوۆ باستاعان توپ قوناقتاردى قارسى الىپ، ارىستان باب كەسەنەسىنە الىپ باردى. كەرۋەننىڭ قۇرامىنداعى قاراعاندى وبلىسىنىڭ ءبىر توپ ەل اعالارى مەن زيالى قاۋىم وكىلدەرى بابانىڭ باسىندا قۇران باعىشتاپ، زيارات ەتتى. ودان كەيىن اۆتوكەرۋەن كيەلى تۇركىستان شاھارىنا جول تارتتى. ولاردى قالا باسشىلىعى مەن جۇرتشىلىعى بارشا ءسان- سالتاناتىمەن قارسى الدى. مارتەبەلى قوناقتار ق. ا. ياساۋي كەسەنەسىندە بولىپ، وسىندا جەرلەنگەن قازاقتىڭ تاريحي تۇلعالارىمەن تانىسىپ شىقتى.
كەسەنە الدىنداعى الاڭدا وتكەن شارا اياسىندا شاھار باسشىسى الىپبەك وسەربايەۆ: «سوناۋ ارقا جەرىنەن ەر تۇرىكتىڭ بەسىگى اتانعان كيەلى تۇركىستان توپىراعىنا بابالارىمىزدىڭ رۋحىنا تاعزىم ەتىپ كەلىپ جاتقان قادامدارىڭىزعا گۇل بىتسىن. مىنە، بۇل شارا دا ەلباسىنىڭ «رۋحاني جاڭعىرۋ» باعدارلاماسىن جۇزەگە اسىرىپ، تاريحىمىزدى تۇگەندەۋدىڭ بىر كورىنىسى» ، - دەپ اتاپ ءوتتى.
بۇدان كەيىن دەلەگاتسيا مۇشەلەرى مەن ق ر پارلامەنتى ءماجىلىسىنىڭ دەپۋتاتى، بوكستان وليمپيادا چەمپيونى سەرىك ساپييەۆ ءسوز الىپ، بۇگىنگى بابالار رۋحىنا تاعزىم شاراسىنىڭ ماڭىزدىلىعىنا توقتالدى. ولار حالقىمىزدىڭ جارقىن بولاشاعى جولىندا تاريحتا ەرەكشە قولتاڭبا قالدىرعان بابالار رۋحىن قاستەرلەۋ تۋرالى ءوز ويلارىن ورتاعا سالدى. قاراعاندىلىق قوناقتار وبلىس جاستارىنىڭ دوڭگەلەك ۇستەل ماجىلىسىنە دە قاتىسىپ، كەشكە «ۇلى دالا ءۇنى» اتتى كونسەرتتىك باعدارلامانى تاماشالادى. ايتا كەتەيىك، مەرەيتويلىق باعدارلاما اياسىندا وبلىسقا كوش تۇزەگەن بۇل اۆتوكەرۋەن ەلىمىزدىڭ بۇكىل قاسيەتتى ورىندارىن ارالاپ كەلە جاتىر. قىزىلوردا وبلىسىنداعى قورقىت اتا كەشەنىندە بولعان كەرۋەن ەندى كورشى وزبەك ەلىنىڭ تاشكەنت قالاسىندا جانە ناۋاي وبلىسىندا بولىپ، تولە جانە ايتەكە بيلەردىڭ ءارۋاعىنا تاعزىم ەتپەك.
ايتا كەتەيىك، 7 اۆتوكولىكپەن شىققان 28 ادامنان تۇراتىن اۆتوكەرۋەن مۇشەلەرى مەن قاراعاندى وبلىسىنىڭ رەسمي دەلەگاتسياسىنىڭ ساپىندا، قازاقستان رەسپۋبليكاسىنىڭ ەڭبەك سىڭىرگەن قايراتكەرى، «پاراسات» وردەنىنىڭ يەگەرى رىمبالا وماربەكوۆا، قازاقستان رەسپۋبليكاسى پارلامەنت ءماجىلىسىنىڭ دەپۋتاتى سەرىك ساپييەۆ، ق ر ءدىن ىستەرى جانە ازاماتتىق قوعام مينيسترلىگىنىڭ جاستار ساياساتى دەپارتامەنتىنىڭ ديرەكتورى عابيدوللا وسپانقۇلوۆ، قاراعاندى وبلىسىنىڭ جاستار ساياساتى ماسەلەلەرى جونىندەگى باسقارما باسشىسى ميراس قۇتتىباي بار.
اۆتور: اينۇر اقبايەۆا
