ەلىمىزدە ۇشاق بيلەتتەرى قىمباتتاۋى مۇمكىن

اسىرەسە «ەير استانا». ويتكەنى، «ەير استانانىڭ» جالعىز ءوزى عانا جىلىنا جۇزدەگەن ميلليون تەڭگە اۋدارادى ەكەن. اۋەجايدىڭ بۇدان باسقا دا تابىسى جەتىپ ارتىلادى دەگەن تاسىمالداۋشى، تاريفتى وسىرمەۋدى سۇراپ وتىر. كەرى جاعدايدا، بيلەت قۇنى بۇرىنعىدان دا قىمباتتاي تۇسپەك، دەپ حابارلايدى ك ت ك ارناسى.

الماتى اۋەجايىنىنىڭ قىزمەتتەرىنە باعانى كوتەرەمىز دەگەنى ءبىرىنشى كەزەكتە «ەير استاناعا» جاقپاي قالدى. ويتكەنى، سول قىزمەتتەردى نەگىزگى پايدالانۋشى وسى كومپانيا. ايتۋلارىنشا، اۋەگە ۇشىپ- قونۋ سەكىلدى ەڭ اۋىر جۇمىستى اتقاراتىن - وزدەرى، ال پايداسىن كورەتىن اۋەجاي. ماسەلەن، بىلتىر «ەير استانا» اۋەجايعا ىشكى رەيستەردىڭ كەلىپ-كەتكەنى ءۇشىن عانا 82 ميلليون تەڭگە تولەپتى. ال حالىقارالىق رەيستەر ءۇشىن بەرگەن اقشاسى ودان دا كوپ. 208 ميلليون تەڭگە.

«بىلتىردىڭ وزىندە عانا الماتى اۋەجايى 3 ميلليارد تەڭگەدەن استام پايدا تاپقان. ونىڭ الدىڭعى جىلعى تابىسى دا 3 ميللارد تەڭگەدەن اسادى. ارينە، اۋەجاي ءوز تاريفتەرىن كوتەرسە، ءبىز دە بيلەت باعاسىن وسىرۋگە ءماجبۇر بولامىز. باسقا ارىپتەستەرىمىز دە ۇشىپ- قونۋ قىزمەتىنە باعا كوتەرىلدگەن جاعدايدا تاريفتەرىن وسىرۋگە دايىن وتىر»، - دەيدى «ەير استانا» اۋە كومپانياسىنىڭ مەنەدجەرى ەۆگەني اكسەنوۆ.

الماتى اۋەجايىنا بارلىعى 33 اۋە كومپانياسىنىڭ ۇشاقتارى ۇشىپ- قونادى ەكەن. ءبىراق، سوعان قاراماستان قاۋىپسىزدىكتى العا تارتقان اۋەجاي باسشىلارى تەحنيكانى جاڭارتۋعا تاعى 1 ميلليارد 789 ميلليون تەڭگە قاجەت دەپ وتىر. ال ونى تابۋدىڭ ءبىر عانا جولى اۋە كومپانيالارىنا كورسەتىلەتىن قىزمەت اقىسىن ءوسىرۋ ەكەن.

«اۋە كومپانيالارىنا قاۋىپسىزدىك قاجەت بولسا، البەتتە ول ءۇشىن شىعىندالۋلارى كەرەك. سوندا عانا تالاپقا ساي جاعداي جاسايمىز. ءبىز قورىمىزداعى قارجىنى دا جاراتىپ جاتىرمىز. ماسەلەن، ۇشىپ- قونۋ جولاعىن جوندەۋگە ءوز ەسەبىمىزدەن 6 ميلليارد تەڭگە جۇمسادىق. پەررون تەحنيكالارىن دا جاڭارتۋعا دا اقشا شىعىنداپ جاتىرمىز»، - دەيدى «الماتى حالىقارالىق اۋەجايى» ا ق ۆيتسە-پرەزيدەنتى سەرىك مىقتىبايەۆ.

وسىلاي دەپ اقتالعان اۋەجاي باسشىلارى مودەرنيزاتسيا جاساۋعا وزدەرىنىڭ ميللياردتارى جەتكىلىكسىز ەكەنىن اشىق ايتتى. دەسە دە، بۇل ۋاجگە «ەير استانا» سەنگىسى جوق. ويتكەنى، ولاردىڭ مالىمەتى بويىنشا بىلتىر الماتى اۋەجايىنىڭ 7 بىردەي توپ- مەنەدجەرى جالاقىدان بولەك، 125 ميلليون تەڭگەنى سىياقى رەتىندە ءوزارا تەڭدەي ءبولىسىپ العان ەكەن. اقپاراتتى اۋە كومپانياسىنداعىلار تاراتقانىنا اۋەجاي باسشىلىعى كادىمگىدەي شامدانىپ قالدى.

«ەير استانادا» 32 ۆيتسە-پرەزيدەنت وتىر دەپ جاتقان جوقپىن! ولاردىڭ قانشا الاتىنىن دا ايتىپ وتىرعانىم جوق» ، - دەيدى «الماتى حالىقارالىق اۋەجايى» ا ق ۆيتسە-پرەزيدەنتى سەرىك مىقتىبايەۆ.

ال ءتاريفتى كوتەرۋ تۋرالى ۇسىنىستى قازىر ازاماتتىق اۆياتسيا كوميتەتى قاراستىرىپ جاتىر ەكەن.

اۋەجاي قىزمەتتەرىنە تاريفتى قىمباتتاتقان كۇنى-اق اۋە تاسىمالداۋشىلارى بيلەت باعاسىن كوتەرمەكشى. ياعني، اينالىپ كەلگەندە قاۋىپسىزدىك ءۇشىن جۇمسالاتىن ميلليوندار الپاۋىت كومپانيالاردىڭ ەمەس، تاعى سول قاراپايىم جولاۋشىنىڭ قالتاسىنان شىققالى تۇر.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى