اۆستراليالىق عالىمدار سۋىقتا اۋانى جىلىتاتىن ەرەكشە جۇيە ويلاپ تاپتى
ول جەرگىلىكتى تۇرعىندار اراسىندا سۇرانىسقا يە بولا باستاعان، دەپ جازادى «حابار 24».
ۇسكىرىك اياز، بۇرقاسىن بوران بولعانىمەن، جەردىڭ تەك بەتكى قاباتى عانا قاتاتىنى بەلگىلى. ياعني جەر استىنداعى جىلۋ سىرتقا شىقپايدى. توپىراق جىلۋ جىبەرمەيدى. تابيعاتتىڭ وسى قاسيەتىن اۆستراليالىق ماماندار كادەگە جاراتتى. ولار جازدىڭ ىستىق اۋاسىن جەر استى قويماسىنا جيناپ، سۋىق تۇسكەندە نىساندى جىلىتۋعا پايدالانادى.
اۋەلدە تىڭ جۇيە تەك گەولوگيالىق عىلىمدار اگەنتتىگىنىڭ نىساندارىندا عانا قولدانىلاتىن. ءقازىر تۇرعىندار اراسىندا دا سۇرانىس ارتقان.
«بۇل جۇيە جەردىڭ تۇراقتى تەمپەراتۋراسىن پايدالانادى. 100 مەتر تەرەڭدىكتەگى اۋانىڭ تەمپەراتۋراسى قىسى- جازى 17-18 تسەلسيي گرادۋستى ساقتايدى»، - دەيدى گەولوگيالىق عىلىمدار اگەنتتىگىنىڭ قىزمەتكەرى حاننا سلەتتەري.
عالىمدار جازدىڭ اپتاپ ىستىعىندا جەر استىنداعى قوڭىر سالقىن اۋانى سورىپ الىپ، ورنىنا ىستىق اۋا جينايدى. ال قىستا جۇيە كەرىسىنشە جۇرەدى. گەولوگيالىق عىلىمدار اگەنتتىگى وسى تەحنولوگيانى ويلاپ تاپقان ساتتە ءبىر ميلليون دوللار ۇنەمدەۋدى جوسپارلاعان. ودان بەرى ەلەكتر قۋاتى قىمباتتادى. سوندىقتان پايدا ويداعىدان دا كوبەيە ءتۇستى. ەندى جەرگىلىكتى تۇرعىندار مۇنى ءوز ۇيىنە ورناتىپ، اقشاسىن ۇنەمدەمەك.
«بۇرىن بىزبەن ەشكىمنىڭ ءىسى بولمايتىن. ەندى تاپسىرىس كوبەيدى. ءىسىمىز وڭعا باسقانى كورىنىپ تۇر»، - دەيدى جۇيەنى ورناتۋشى تۋيس سميت.
كانبەررا جاعالاۋدان الىس، بيىك جەردە ورنالاسقان. سوندىقتان جازى ىستىق، قىسى قىتىمىر. ءدال وسى كليماتتىق جاعدايعا تىڭ جۇيەنىڭ تيىمدىلىگى مول. ءبىراق تۇرعىنداردىڭ ونى جاپپاي ورناتۋعا قالتاسى كوتەرمەيدى. ءسويتىپ بۇل تەحنولوگيانىڭ ارتىقشىلىعى كوپ بولعانىمەن، اركىمنىڭ قولى جەتە بەرمەيتىن قىمبات جۇيە بولىپ ەسەپتەلەدى.
