پروكۋراتۋرانىڭ «راقىمشىلىعىنا» نارازى شىمكەنت تۇرعىنى كوشەگە شىقتى - فوتو، ۆيدەو
ول ءبىر جىل بۇرىن جول بويىندا ءتورت جۇمىسشىنى كولىكپەن قاعىپ، بىرەۋىن مەرت قىلعان جۇرگىزۋشىنىڭ بوستاندىققا شىعىپ كەتۋىنە قاتىستى نارازىلىعىن بىلدىرۋدە، دەپ حابارلايدى «قازاقپارات» ح ا ا ءتىلشىسى.
قوعام بەلسەندىسىنىڭ سوزىنشە، جول بويىندا جىلۋ قۇبىرلارىن تارتىپ جاتقان ساتتە قازا تاپقان مۇرات الىبەك نەبارى 21 جاستا بولعان. ال ونى باقيلىق ەتكەن جۇرگىزۋشى بوستاندىقتا ءجۇر.
«مەن ادامدارعا وسى جاعدايدى ەسكە سالۋ ءۇشىن شىعىپ وتىرمىن. بۇل ميتينگ نە بولماسا نارازىلىق اكسياسى ەمەس. مەن وسى ەلدىڭ ازاماتى رەتىندە زاڭعا ءبارى باعىنسا دەيمىن. ويتكەنى بۇل جەردە ادام ءولىپ وتىر. بۇل تراگەديا. ول ءجاي ەمەس، جۇمىسىن ىستەپ، ءوز مىندەتىن جاساپ جاتقاندا اجال قۇشتى. مەن ول جىگىتتى تانىماعانمىن. تۋىس تا ەمەسپىن. الايدا ءبىز وسى ەلدىڭ ءبىر ازاماتىن جوعالتتىق. مۇنداي جاعدايلار ورىن الا بەرسە نە بولادى؟»، - دەيدى امانگەلدى قالىبەك.
ەسكە سالايىق، ءبىر جىل بۇرىن تاڭعى التىلار شاماسىندا جول بويىندا قۇبىر تارتۋ جۇمىستارىن جۇرگىزىپ جاتقان ءتورت جۇمىسشىنى جەڭىل كولىك قاعىپ كەتكەن بولاتىن. ماشينانى تىزگىندەگەن يسمايىل سۇلەيمەن قاتتى جىلدامدىقپەن ءجۇرىپ كەلە جاتىپ، رولگە يە بولا الماي قالعان. ءتىپتى ماشيناسىمەن بىرگە شۇڭقىرعا قۇلعان. سالدارىنان ءۇش جۇمىسشى جاراقات الىپ، ءتورتىنشىسى قازا تاپتى. جۇرگىزۋشى اۋىر جاراقاتتار الىپ، سول جەردە مەرت بولعان جابىرلەنۋشى مەن جاراقاتتانعان وزگە ءۇش جۇمىسشىعا كومەكتەسۋدىڭ ورنىنا، وقيعا ورنىنان بوي تاسالاعان.
كەيىنەن ءتارتىپ ساقشىلارى جاس جىگىتكە حالىقارالىق ىزدەۋ جاريالادى. الايدا، ونى ۇستاۋ مۇمكىن بولمادى. ونىڭ سول ۋاقىتتا قازاقستان اۋماعىنان شەتەلگە شىعىپ كەتكەنى بەلگىلى بولدى. ول كەيىن پوليتسياعا ءوزى كەلگەنىمەن، راقىمشىلىققا ىلىگىپ، بوستاندىققا شىققان. بۇل تۋرالى كۇنى كەشە عانا ءمالىم بولدى.
«راقىشىلىق زاڭىنا سايكەس، بۇل قىلمىستىق ءىس امنيستياعا بايلانىستى توقتامعا الىنعان. جانە وسى انىقتاۋشىلاردىڭ شەشىمىمەن كەلىسۋ ءۇشىن ءال-فارابي اۋداندىق پروكۋراتۋراسىنا جولدانعان. ال پروكۋراتۋرا ءوز الدىنا وسى شەشىممەن كەلىستى»، - دەيدى وبلىستىق ءى ءى د باسپا ءسوز قىزمەتىنىڭ جەتەكشىسى سالتانات قاراكوزوۆا.
