وقۋعا تۇسە الماي قالعان تالاپكەرلەرگە تاعى ءبىر مۇمكىندىك بەرىلمەك
قاراعاندى وبلىسىنداعى ءبىرقاتار كوللەدجدەر دە وسى باعىتتا ستۋدەنتتەردى قابىلداۋعا ءازىر. Baq.kz اگەنتتىگىنىڭ ايماقتاعى ءتىلشىسى ارنايى ورتا ءبىلىم بەرەتىن مەكەمەگە باس سۇعىپ، كوللەدجدىڭ ستۋدەنتتەر قابىلداۋعا دايىندىق بارىسىن كورىپ قايتقان ەدى.
قانداي دا ءبىر سەبەپتەرمەن وقۋعا تۇسە الماي قالعان مەكتەپ بىتىرۋشىلەرىنە تاعى ءبىر مۇمكىندىك بەرىلمەك. ولار تەحنيكالىق جانە كاسىپتىك ءبىلىم بەرۋ وقۋ ورىندارىنا ءتۇسىپ، 2,5 -جىل تەگىن ءبىلىم الاتىن بولدى. قاراعاندىنىڭ تەحنولوگيا جانە سەرۆيس كوللەدجى دە وسىنداي 25 بالانى قابىلداۋعا ءازىر.
«قازىرگى ۋاقىتتا اۋىلدار مەن اۋدانداردا، جەرگىلىكتى جەرلەردە ارنايى ءموبيلدى توپتار قۇرىلىپ، ءبىلىم العىسى كەلەتىن بالالاردى انىقتاپ جاتىر. وبلىستىق ءبىلىم ءبولىمى تامىزدىڭ 25-نە دەيىن وقۋعا قابىلداناتىن بالالاردىڭ ءتىزىمىن جاساپ، ولارعا جولداما بەرىپ، بىزگە جىبەرەتىن بولادى. مەملەكەتتىك تاپسىرىس بويىنشا ءبىزدىڭ كوللەدج دە وقۋعا تۇسە الماعان 25 وقۋشىنى «تەلەكوممۋنيكاتسيالىق قۇرال- جابدىق جانە تۇرمىستىق تەحنيكا» ماماندىعى بويىنشا قابىلداۋعا ءازىرمىز. باسىمدىق جاعدايى تومەن جانە كوپ بالالى وتباسىلاردىڭ بالالارىنا، جەتىم جانە مۇگەدەك بالالارعا بەرىلەدى. ولار ءبىر مەزگىلگى ىستىق تاماق، جول اقى، شاكىرتاقى جانە جاتىن ورىنمەن قامتاماسىز ەتىلەدى»، - دەيدى كوللەدج ديرەكتورى جۇماعالي ماعزيەۆ.
جالپى اتالعان كوللەدج جىلىنا مەملەكەتتىك تاپسىرىسپەن 210 ستۋدەنت قابىلدايدى. ولار «شاشتاراز ءىسى جانە مودەلدەۋ»، «تىگىن ءوندىرىسى»، «تەلەكوممۋنيكاتسيالىق قۇرال- جابدىق پەن تۇرمىستىق تەحنيكانى جوندەۋ جانە قىزمەت كورسەتۋ»، «ءىس جۇرگىزۋ جانە مۇراعاتتانۋ» سياقتى ماماندىقتار بويىنشا ءبىلىم الادى. كوللەدج ديرەكتورىنىڭ ايتۋىنشا، بيىلعى جىلى «اياق كيىم جوندەۋ» دەپ اتالاتىن جاڭا ماماندىق اشىلعان.
«بۇل ماماندىق قاراعاندىدا ەش جەردە وقىتىلمايدى. ءتىپتى ەلىمىز بويىنشا دا وسى ماماندىق بويىنشا ءبىلىم بەرەتىن مەكەمە جوقتىڭ قاسى. بۇل ماماندىققا مۇمكىندىگى شەكتەۋلى جاندار دا قابىلداناتىن بولادى. ينكليۋزيۆتى نەمەسە جارتىلاي ينكليۋزيۆتى توپ بولادى دەپ جوسپارلانۋدا»، - دەيدى جۇماعالي ديار ۇلى.
كوللەدجدە قىسقا مەرزىمدىك كۋرستار دا وقىتىلادى. 1-6 اي ارالىعىندا «تىگىن ءوندىرىسى»، «شاشتاراز ءىسى» سياقتى ماماندىق بويىنشا ءبىلىم الىپ، ارنايى كۋالىككە يە بولادى. قازىردىڭ وزىندە 57 ادام قىسقا مەرزىمدە كاسىپتىك وقىتۋ بويىنشا ءبىلىم الۋدا.
Baq.kz
