ەكىدەن اسقان استانالىق بالالار جۇمىسقا ورنالاسىپ، «جالاقى» الا الادى

استانا قالاسى اكىمدىگىنىڭ مۇرىندىق بولۋىمەن 19 -تامىز كۇنى (ساعات 11:00-16:00 ارالىعىندا) «اراي» ساياباعىندا «ماماندىقتار قالاسى» اتتى حالىقارالىق ءىس- شارا وتەدى.

«ءتورت جىل بويى ۋكراينادا وتكىزىلىپ كەلگەن تابىستى جوبا استاناعا كەلدى. «ماماندىقتار قالاسىندا» 2-18 جاس ارالىعىنداعى بالالار قۇتقارۋشى، ءورت ءسوندىرۋشى، كينولوگ، دارىگەر، بانكير، ديدجەي، اكتەر، مودەل، اسپاز سەكىلدى جۇزدەن استام ماماندىقپەن تانىسادى جانە ناعىز مامانداردىڭ جەتەكشىلىگىمەن شەبەرلىك- ساباقتارىن الادى. بۇل - بالالاردىڭ شىعارماشىلىق الەۋەتىن اشاتىن تاماشا مۇمكىندىك. استانانىڭ بارلىق كىشكەنتاي تۇرعىندارىن قىزىقتى جوباعا قاتىسۋعا شاقىرامىز»، - دەدى استانا قالاسى كاسىپكەرلىك جانە ونەركاسىپ باسقارماسىنىڭ باسشىسى رىسگۇل قاۋعابايەۆا اكىمدىكتە وتكەن باسپا ءسوز ءماسليحاتىندا.

سونىمەن بىرگە، باسپا ءسوز ءماسليحاتىنا جوبا اۆتورى تاتيانا ليۋلكا قاتىستى. ونىڭ ايتۋىنشا، ءار ادام ءوز سۇيىكتى ىسىمەن اينالىسۋى كەرەك جانە «ماماندىقتار قالاسى» بالانىڭ ومىرلىك ماماندىعىن اداسپاي تابۋعا مۇمكىندىك بەرمەك.

«ۋكراينادا ج و و- نى اياقتاعان ادامداردىڭ 52 پايىزى ءوز ماماندىعى بويىنشا جۇمىس ىستەمەيدى. بۇل ارينە قىنجىلتارلىق جاعداي. 2014 -جىلى انا رەتىندە، بيزنەسمەن رەتىندە جاي عانا قايىرىمدىلىق قورىن ەمەس، «ماماندىقتار قالاسى» اتتى الەۋمەتتىك جوبا اشتىم. مۇندا بالالارعا قوعامنىڭ مودەلىن كورسەتكىم كەلدى. ءاربىر قوعامنىڭ ۇستاناتىن ءوز زاڭى، ءوز ەرەجەسى بولادى. سول سەبەپتى، ءبىزدىڭ قالاشىقتا بالالارعا كۋالىك بەرىلەدى، ەرەسەك ومىردە كۋالىكسىز جۇمىس ىستەۋ مۇمكىن ەمەس. بۇل كۋالىك ەڭبەك كىتاپشاسىنىڭ دا ءرولىن اتقارادى. بالالار جۇمىسقا ورنالاسۋدىڭ قاعيدالارىن ءتۇسىنۋى كەرەك. ەڭبەكاقىسىز دا جۇمىس بولمايدى، سوندىقتان ءاربىر جۇمىسى ءۇشىن بالالارعا ءجۇز تەڭگەدەن «جالاقى» تولەنەدى. جينالعان شارتتى «تەڭگەلەرگە» بالالار قالا اۋماعىنداعى دۇكەنىنەن تاتتىلەر مەن بالمۇزداقتار ساتىپ الادى. وسىلايشا، بالالار ءوزىنىڭ قاي سالاعا بەيىم ەكەنىن باعامداي الادى جانە ەڭبەك ەتۋدىڭ ماڭىزدىلىعىن تۇسىنەدى»، - دەيدى ت. ليۋلكا.

ايتا كەتەيىك، «ماماندىقتار قالاسىنا» كىرۋ تەگىن. وعان 2-18 جاس ارالىعىنداعى بالالار قاتىسا الادى.

وتكەن جىلى ۋكراينانىڭ 25 قالاسىندا «ماماندىقتار قالاسى» جوباسىنا 326675 بالا قاتىسقان.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى