الماتى بيلىگى ۇزاققا سوزىلعان جول قۇرىلىسىنا قاتىستى تۇسىنىك بەردى
الەۋمەتتىك جەلى ارقىلى پىكىرلەرىن بىلدىرگەن ولاردىڭ دەنى جۇمىستى اياقتاۋعا اسىقپاعان جۇمىسكەرلەردى كىنالاۋدا.
ازاماتتاردىڭ نارازىلىعى بويىنشا قازاقپارات ءتىلشىسى قالا اكىمدىگىنەن جاۋاپ العان ەدى.
ءمالىم ەتىلگەندەي، بيىل قالادا جىلداعىدان ءۇش ەسە ارتىق كولەمدە جوندەۋ جۇمىستارىن جۇرگىزۋ جوسپارلانعان. مۇنداي ىڭعايسىزدىقتاردىڭ تۋىنداپ جاتقانى دا سول سەبەپتى.
ال قۇرىلىسشىلاردىڭ ارەكەتسىزدىگىن اكىمدىكتەگىلەر جالقاۋلىق ەمەس، دەمالىس كۇندەرگە ىڭعايلانعان جۇمىس كەستەسى دەپ ءتۇسىندىردى. قالادا كەپتەلىس بولماۋ ءۇشىن قۇرىلىس جۇمىستارى دەمالىس كۇندەرى جاندانادى ەكەن.
الماتى اكىمىنىڭ ورىنباسارى ەرلان اۋكەنوۆتىڭ ايتۋىنشا، بيىل قالادا تارتىلعان ينجەنەرلىك جەلىلەردىڭ كولەمى تاريحتا بولماعان كورسەتكىشكە جەتتى.
«جاڭا جىلىتۋ ماۋسىمىنا دەيىن 32 شاقىرىم جىلۋ جەلىسىن جوندەۋ جوسپاردا بار. بۇل بىلتىرعىدان 2,7 ەسە كوپ. جەلىلەرگە جاڭا قۇبىرلار ورناتىلىپ جاتىر. زاماناۋي قۇبىرلار 40 جىلعا دەيىن توزبايدى. جول قوزعالىسىن شەكتەۋدى ازايتۋ ءۇشىن جۇمىستار كوبىنە دەمالىس كۇندەرىنە كەلتىرىلەدى. وندا دا كوشەلەر 72 ساعاتقا عانا جابىلادى.
بيىل «ايگەرىم»، «ۇلجان 1, 2»، «قاراسۋ»، «اقبۇلاق»، «دارحان»، «قۇرىلىسشى»، «وجەت»، «ترۋدوۆيك»، «شاڭىراك 1, 2»، «التىن بەسىك»، «دوستىق» شاعىن اۋداندارىنىڭ تۇرعىندارىن سۋعا قوساتىن 380 شاقىرىم سۋ جەلىسى تارتىلادى. جازدىڭ اياعىنا دەيىن 97 مىڭ شارشى مەتر تروتۋار، 146 شاقىرىم جول سالىنادى»، - دەدى ول.
بيىل 317 شاقىرىم سۋ جەلىسى مەن 265 شاقىرىم كارىز جەلىسىنە 25,5 ميلليارد تەڭگە بولىنگەن.
