بيىل تۇرعىن ءۇي قۇرىلىس جيناق بانكى كەپىلسىز كرەديت بەرە باستايدى

ەندى ازاماتتار پاتەردى كەپىلسىز كرەديت ارقىلى الا الادى. بۇل تۋرالى ۇكىمەت باسپا ءسوز ورتالىعىندا «نۇرلى جەر» باعدارلاماسىنا ارنالعان بريفينگتە «قازاقستاننىڭ تۇرعىن ءۇي قۇرىلىس جيناق بانكى» ا ق باسقارما ءتورايىمى ءلاززات يبراگيموۆا ايتتى.

«جاقسى جاڭالىعىم بار. قازاقستاندا تۇرعىن ءۇي قۇرىلىسىنا كەپىلدىك بەرۋ قورى ازاماتتارعا ۇلەسكەرلىك قۇرىلىسقا قاتىسۋعا مۇمكىندىك بەرەدى. «بايتەرەك» حولدينگىنىڭ ەنشىلەس كومپانياسى قۇرىلىستى اياقتاۋعا كەپىلدىك بەرۋ ءۇشىن قۇرىلدى. وسىعان وراي ءبىز العاشقى جوبانى قولعا الدىق. قىركۇيەك ايىنان باستاپ «ميللەنيۋم پارك» تۇرعىن ۇيىنە قۇجاتتاردى قابىلداي باستايمىز. مۇنداعى پاتەردىڭ ءبىر شارشى مەترى 290 مىڭ تەڭگەدەن باستالادى. ءبىز وسى ءۇيدى ءوز سالىمشىلارىمىزعا بەرەمىز»، - دەدى ول.

ءلاززات يبراگيموۆا اتالمىش جوبانىڭ تالابىن ءتۇسىندىردى. ونىڭ ايتۋىنشا، بۇدان بىلاي بانك ارنايى كەپىلسىز كرەديت بەرە باستايدى.

«مۇندا كەپىلدىكتى ۇلەسكەرلىك قۇرىلىسىنا قاتىسۋ شارتى بەرەدى. سەبەبى، جوعارى اتالعان نىسان «بازيس ا» كومپانياسىنا تيەسىلى. ول تۇرعىن ءۇي قۇرىلىسى كەپىلدىك بەرۋ قورىنان كەپىلدىك العان. بۇل - «نۇرلى جەر» مەملەكەتتىك باعدارلاماسىنىڭ ءبىر كومپەنتەنتى. سوندىقتان بارلىق تىلەك بىلدىرۋشىلەردى باعدارلاماعا قاتىسۋعا شاقىرامىز»، - دەپ تۇيىندەدى ءسوزىن «قازاقستاننىڭ تۇرعىن ءۇي قۇرىلىس جيناق بانكى» ا ق باسقارما ءتورايىمى.

Baq.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى