كوكپاردىڭ ەرەجەلەرىنە وزگەرىس ەنگىزىلدى - بەكبولات تىلەۋحان

 «وسى «ەكسپو-2017» كورمەسىنىڭ اياسىندا الەم چەمپيوناتىن وتكىزەمىز دەپ، شەتەلدەگى ارىپتەستەرمەن اقىلداسقان كەزىمىزدە كوكپاردىڭ ەرەجەلەرىن جەڭىلدەتۋ ماسەلەسىن قاراستىردىق. قازىر وزگەرتتىك. وسى ۋاقىتقا دەيىن كوكپارشىلار سەركەنى قازاندىققا سالاتىن. كوكپاردىڭ الەمدىك دەڭگەيدە دامۋى ءۇشىن ونىڭ ەرەجەلەرىن بارىنشا جەڭىلدەتۋ قاجەتتىلىگى تۋدى. جاراقات الۋ قاۋپى تىم كوپ. قازاندىققا سوعىلىپ، كوكپارشى ىشىنە بىرگە ءتۇسىپ كەتىپ، جاراقاتانىپ جاتادى. ال امەريكالىقتار كەز كەلگەن دۇنيەنى وزىنە بەيىمدەپ الادى. ولارعا سپورت ءتۇرىن قىزىقتى كورسەتە ءبىلۋ كەرەك قوي. امەريكاداعى ارىپتەستەر شەڭبەرمەن ويناۋدى قولعا الىپ جاتىر ەكەن. سوندىقتان وسى كوۆبويلاردىڭ ۇلگىسىن تىلگە تيەك ەتە وتىرىپ، تاجىكستاندىق جانە وزبەكستاندىق كوكپارشىلار «شەڭبەرگە شاپساق قالاي بولادى؟ » دەپ ۇسىنىستارىن ءبىلدىردى. ءبىز ونى قابىلدادىق» ، - دەيدى بەكبولات تىلەۋحان.

 قاۋىمداستىق پرەزيدەنتىنىڭ ايتۋىنشا، 1996 -جىلى كوكپارشىلاردىڭ قازاندىققا شاباتىن ءتارتىبى بويىنشا ەرەجە قابىلدانعان. ءبىراق ول ەرەجە تارتىبىمەن قازاق پەن قىرعىزدان باسقا ەشكىم ويناي الماي قويعانعا ۇقسايدى. سوندىقتان، ەرەجەنى بارىنشا قاراپايىم رەتكە كەلتىرۋ تۋراسىندا شەشىم قابىلدانعان. «ءتيىستى ماماندارمەن اقىلداستىق. كوكپاردىڭ فيلوسوفياسى بىلاي: كوكپار - ولجا، تروفەي. ورتاعا تاستاعان سوڭ «سەنىڭ قازانىڭا سالامىن» دەپ ايتۋدىڭ ءوزى ونىڭ فيلوسوفياسىنا قايشى. ادام العان ولجاسىن ءوزىنىڭ اۋىلىنا قاراي تارتادى. سول سەكىلدى ورتاعا تاستاعان سەركەنى ءوزىنىڭ شەڭبەرىنە تارتۋ كەرەك دەگەن پىكىردى ۇلكەن عالىمدار ايتتى. جالپى كوكپار فيلوسوفياسىنا سايكەستەندىرىڭىزدەر دەگەن سوڭ، سولاي ەتتىك. بالەندەي ايىرماشىلىق جوق. سول بۇرىنعىداي، سالىم سالۋ، جەكپە- جەك ءبارى قالادى، تەك باعىتى وزگەرەدى» ، - دەيدى ول. استانادا وتەتىن الەمدىك جارىسقا سەركەنىڭ ورنىنا مۋلياج تارتىلماق. ويتكەنى ءار ءتۇرلى ەلدە سەركە تارتۋدى ءارتۇرلى قابىلدايدى. قايشىلىقتار تۋىنداماس ءۇشىن كوكپارشىلارعا مۋلياج تارتقىزۋ ويلاستىرىلعان.

ەسكە سالا كەتسەك، ەلورداداعى «قازانات» ستاديونىندا 20-28 - تامىز ارالىعىندا كوكپاردان الەم چەمپيوناتى وتەدى. اۋقىمدى جارىسقا كورشىلەس ەلدەرمەن قاتار، ا ق ش پەن تۇركيا ەلدەرىنىڭ كوكپارشىلارى قاتىسپاق. جالپى جۇلدە قورىنا 18 ميلليون تەڭگە بولىنگەن. جەڭىمپاز كوماندا 10 ميلليون تەڭگەنى ولجالايدى.

 اۆتور: ايان بەكەن ۇلى  

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى