ەلىمىزدەگى ءبىلىم بەرۋ جۇيەسىنە تاعى دا وزگەرىس ەندى
ال الدىڭعى جىلدارى شىققان وقۋلىقتار ەندى جارامسىز. قازىر ۇستازدارعا تىڭ جۇيە تانىستىرىلىپ جاتىر، دەپ حابارلايدى الماتى ارناسى.
وسى كۇنگە دەيىن 83 مىڭ پەداگوگ جاڭارتىلعان باعدارلامانى مەڭگەرگەن ەكەن. تىڭ جوبادا تەوريالىق بىلىمنەن گورى، تاجىريبەگە باسىمدىق بەرىلگەن. جاڭا وقۋلىقتار بىلىمگەرلەرگە تەگىن تاراتىلادى. ال ۇستازدارعا ولاردىڭ ەلەكتروندىق نۇسقاسى بەرىلەدى.
«جاڭا وقۋلىقتار بارلىق وقۋشىلارعا تەگىن. بىلتىرعى وقۋلىقتارمەن وقي المايدى. وقۋشى ءوزى جۇمىسقا كىرىسىپ، ءوزى زەرتتەپ، پراكتيكالىق جۇمىس جاسايدى. وسىمدىكتەرمەن، سىزعىشپەن جۇمىس جاساپ، ارالاستىرىپ، ءوزى ويلاپ، ءوزى بولجام جاساپ، سول بولجامدى دالەلدەگەندە عانا سول ءبىلىم وقۋشىنىڭ ءبىلىم بولىپ سانالادى. تەك ءمۇعالىم ايتىپ تۇرسا وقۋشى تىڭداي ما؟ تىڭداماي ما؟»، - دەدى «نازاربايەۆ زياتكەرلىك مەكتەپتەرى» ءبىلىم باعدارلامالارى ورتالىعىنىڭ ديرەكتورى جانار ءابدىلدينا.
سونداي-اق حيميا ءپانى بيىل 7-سىنىپتان باستاپ وقىتىلادى. بۇرىن بۇل سالانى وقۋشىلار 8- سىنىپتاپ باستاپ مەڭگەرەتىن. ال ينفورماتيكا ساباعى كەلەسى جىلى 3-سىنىپتىڭ وقۋشىلارىنا وقىتىلا باستايدى. ءبىلىم بەرۋدى جاڭا باعدارلاماعا تولىقتاي كوشىرۋ 2020 -جىلى اياقتالماق. ەستەرىڭىزدە بولسا، بىلتىر 1-سىنىپقا بارعان بۇلدىرشىندەر جاڭا ادىسپەن وقي باستاعان. ول كەزدە بۇرىننان كەلە جاتقان «الىپپە» وقۋلىق تىزىمىنەن الىنىپ، كوپتىڭ قارسىلىعىن تۋدىرعان ەدى.
«بۇرىن كوبىنەسە فۋندامەنتالدى باعىتتا جۇرگەنبىز. بالا فورمۋلامەن جۇمىس ىستەي بىلەدى. ءبىراق سول فورمۋلالاردى ومىردە قولدانا بىلمەيدى. قازىرگى ءبىزدىڭ باعدارلامالارىمىز ەسەپتەردى، سول فورمۋلالاردى شىنايى ومىردە قولدانۋ. مىسالى، پيراميدانىڭ اۋدانىن فورمۋلا بويىنشا ءبارى تابا الادى. ال ەگەر ءۇي سالاردا قانشا ماتەريال كەتەدى، ونىڭ اۋدانى قانشا دەسەڭ كوبى قينالادى. ال مىنا باعدارلامانىڭ كومەگىمەن لوگيكالىق جانە ابستراكتى ويلايدى»، - دەدى نازاربايەۆ زياتكەرلىك مەكتەبى ماتەماتيكا ءپانى وقىتۋشىلارى ادىستەمەلىك بىرلەستىگىنىڭ جەتەكشىسى سايدحوجا قالقالوۆ.
