بۇگىن استانادا اتاقتى كۇيشى بەيسەنبى دونەنباي ۇلىنىڭ شىعارماشىلىق كەشى وتەدى

استانا قالاسى فيلارمونياسى «سارى ارقا» انسامبلىنىڭ كوركەمدىك جەتەكشىسى ەرجان توقسابانوۆتىڭ ايتۋىنشا، ونەر ۇجىمى بەيسەنبىنىڭ كۇيلەرىن ون جىلدان بەرى تىڭدارماندارىنا ۇسىنىپ كەلە جاتىر. ولاردىڭ قورجىنىندا قازىرگى ۋاقىتتا ايگىلى كۇيشىنىڭ جيىرمادان استام كۇيى بار. ءبىر انسامبل قورىندا ءبىر كۇيشىنىڭ جيىرمادان استام كۇيى بولۋى بۇل جايدان جاي ەمەس، ول دەگەنىمىز بەيسەنبى دونەنباي ۇلى كوپتىڭ ءبىرى ەمەس ەكەنىن كورسەتەدى. «وسى جولعى بەجەڭنىڭ «ءادىل ءبي، تارلان كۇيشى» اتتى شىعارماشىلىق كەشىن وتكىزۋگە ەڭ اۋەلى مۇرىندىق بولعان استانا قالاسى اكىمدىگىنە قاراستى مەملەكەتتىك اكادەميالىق فيلارمونياسىنىڭ باسشىلىعى»، - دەيدى «سارىارقا» انسامبلىنىڭ سىبىزعىشىسى شىعىس ماقان ۇلى.

«ءبىزدىڭ باستى جوسپارىمىز - بەيسەنبى دونەنباي ۇلىنىڭ مول مادەني مۇرالارى ۇستاعاننىڭ قولىندا، تىستەگەننىڭ اۋزىندا كەتپەۋدى ماقسات تۇتىپ، وسىنداي قولدا بار ورايلى ساتتەر ارقىلى، ەكى عاسىردان استام ۋاقىت وتسە دە ەل ەسىندە جاتتالىپ كەلگەن تۋىندىلاردى جالپاق جۇرتقا جاريا ەتۋ بولاتىن»، - دەيدى سىبىزعىشى ش. ماقان ۇلى.

«بۇل جەردە مەن نەگە «ۇستاعاننىڭ قولىندا، تىستەگەننىڭ اۋزىندا» دەپ وتىرمىن»، - دەپ جالعادى ءسوزىن سىبىزعىشى شىعىس ماقان ۇلى.

- سوڭعى ءتورت، بەس جىلدا بەجەڭنىڭ كۇيلەرىن كەيبىر سازگەرسىماقتار ءوز قانجىعالارىنا بايلاپ، تالان-تاراجعا ءتۇسىپ، تونالىپ جاتقانىن كورىپ، ونەر ادامى رەتىندە جۇرەگىم اۋىرىپ، قاتتى ۋايىمداپ ءجۇرمىن. بەجەڭنىڭ كۇيلەرىن ەل نازارىنا جەتكىزۋ، كەيىنگى جاس ۇرپاققا دارىپتەۋگە وسى ۋاقىتقا دەيىن ەشكىم ارەكەت جاساماعان سوڭ، وسىلاي باسشىلارىمىزدىڭ قولداۋىمەن، ءوزىمىز ۇجىم بولىپ قولعا الۋعا تۋرا كەلدى. وسى كەشتى وتكىزۋدەگى باستى ماقساتىمىز - بۇدان ەكى عاسىرعا جۋىق بۇرىن ءومىر سۇرسە دە، ءبي رەتىندەگى ادىلدىگى، كۇيشى رەتىندەگى دارىندىلىعى ەل اۋزىنان ءالى كۇنگە قالماي كەلە جاتقان تارلان كۇيشىنىڭ كۇيلەرىن توزدىرماۋ. ەگەر وسى كەشىمىز ءساتتى ءوتىپ، كوپ كورەرمەندى تارتا الساق، وندا كۇيشى بابامىزدىڭ الدىنداعى پارىزىمىزدى وتەگەن بولار ەدىك»، دەپ تۇيىندەدى ول ءسوزىن. ايتا كەتۋ كەرەك، بەيسەنبى دونەنباي ۇلى (1803-1872) قىتايدىڭ التاي ايماعى، بۋىرشىن اۋدانىندا تۋعان. سول داۋىردەگى التايداعى ايگىلى ءتورت ءبيدىڭ ءبىرى بولعان. ءادىل بيلىگىمەن، اسقان دومبىراشى، سازگەرلىگىمەن حالىققا كەڭىنەن تانىلعان. بەيسەنبى كۇيلەرى قىتاي قازاقتارى اراسىندا، موڭعوليا، شىعىس قازاقستان وڭىرلەرىندە كەڭىنەن تاراعان. اتالعان كەشتە بۇگىنگى كۇنگە 147 كۇيى جەتىپ وتىرعان بەجەڭنىڭ 20 دان استام تۋىندىسى انسامبلدە، ارنايى دومبىرا، نارقوبىز، سىبىزعى، ادىرنا سىندى اسپاپتاردا ورىندالادى. اتالعان كەش ساعات 17:00-دە باستالادى.

اۆتور: بەيسەن سۇلتان

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى