رۋحاني جاڭعىرۋ: اقمولا وبلىسىندا بۇزىلعان كونە قورعاندار قايتا زەرتتەلۋدە - فوتو
تاريحي- مادەني مۇرانى پايدالانۋ جانە قورعاۋ ورتالىعىنىڭ مالىمەتى بويىنشا، «ارحەولوگتار كۇنى» قارساڭىندا قولا داۋىرىنە جاتاتىن اتروپوگەندىك اسەردەن بۇزىلعان، XVIII كەڭوتكەل وباسى ارحەلوگيالىق ەسكەرتكىشىنە بيىل وبلىستىق ارحەولوگيالىق ەكسپەديسيا زەرتتەۋ جۇمىستارىن جۇرگىزدى. قورعاۋ جانە ساقتاپ قالۋ جۇمىستارى سوڭعى 11 جىل بويى قولعا الىنىپ كەلەدى. بيىلعى جىلدىڭ باسىنان بەرى وسىنداي بۇزىلعان 5 قورعان زەرتتەلدى.
ورتالىق ماماندارىنىڭ ايتۋىنشا، بۇل تەڭدەسىز تاريحي ورىندا ەنەوليت داۋىرىنەن باستاپ، ەتنوگرافيالىق زامانعا دەيىن جاتاتىن 200 دەن استام ارحەولوگيالىق ەسكەرتكىش بار. بۇل اقمولا وبلىسى اۋماعىندا كونە مادەنيەتتىڭ بولعانىنىڭ تاعى ءبىر ايعاعى.
ارحەلوگيالىق زەرتتەۋلەر اتالمىش قورعانداردىڭ كونە زاماندا تونالعانىن ايعاقتاپ وتىر. بەس قورعاننىڭ ۇشەۋىندە سول كەزەڭدە ادامداردىڭ وتقا تابىنعانىن بىلدىرەتىن كرەماتسيالاۋ بەلگىلەرى بايقالادى. ەكى قورعاندا باسىن باتىسقا قاراتىپ، جەرلەنگەن ادامنىڭ قاڭقاسى تابىلدى. سونىمەن قاتار، ادام قاڭقاسىمەن بىرگە جەرلەنگەن ىدىس- اياقتار دا تابىلدى. ولاردىڭ سانى توعىز. كەراميكالىق ىدىستار ءتۇرلى ۇلگىدە گەومەتريالىق بەلگىلەرمەن بەزەندىرىلگەن.
تابىلعان ارتەفاكتىلەر قازاقستان تاريحىن، ونىڭ ىشىندە اقمولا وبلىسى اۋماعىندا بولعان كونە مادەنيەت تۋرالى زەرتتەۋ جۇمىستارىن جۇرگىزۋگە سەپتىگىن تيگىزبەك.
قازىرگى كەزدە اقمولا وبلىسى اۋماعىندا 1700 ارحەلوگيالىق ەسكەرتكىش تىركەلگەن. ولاردىڭ بارلىعى 20 عاسىردىڭ ورتاسىندا اشىلىپ، عىلىمي تۇردە باعا بەرىلگەن. نەگىزىنەن ارحەلوگيالىق ەسكەرتكىشتەر زەرەندى، ەڭبەكشىلدەر، بۇلاندى، اتباسار جانە ەرەيمەنتاۋ اۋداندارى اۋماعىندا انىقتالعان.
