ءومىر قىزىقسىز بولسا، نە ىستەۋ كەرەك؟
كۇنبە كۇن ءبىر كورىنىس قايتالانا بەرە مە؟ ەشتەڭەنى وزگەرتۋگە قۇلقىڭىز جوق پا؟ كەيدە ءبىر ورىندا تۇرىپ قالعان ومىردەن ابدەن جالىققاندا ۇلىعىڭىز كەلە مە؟ قىزىقسىز. سەبەبى، قايتالانا بەرەتىن كۇندەلىكتى جاعدايلار. ومىردە ەش وزگەرىس جوق. جاڭالىق كۇن وتكەن سايىن ازايىپ، نە نارسەگە دە تاڭ قالۋدان قالىپ باراسىز با؟ ءتىپتى ويىن- ساۋىقتىڭ ءوزى ەش راحات سىيلامايدى. ەشبىر قىزىققا ايىز قانبايتىن بولدى ما؟ مۇنداي كەزدە ءوزىڭىزدى قولعا الىڭىز.
تاجىريبە جاساڭىز. اسحاناداعى ەسكى رەتسەپتتەر كىتاپشاسىن اۋلاققا تىعىپ تاستاڭىز. ەرەكشە تاعام دايارلاڭىز. تاجىريبەڭىزدى مولايتىڭىز. كۇندەلىكتى تاماقتىڭ ورنىنا مەرەكەلىك داستارحان جايىڭىز. بۇرىن پىسىرمەگەن تاعامداردى، تاتتىلەردى دايارلاڭىز.
وزگەرىڭىز. كيىمدى، شاش قويۋدى، ونىڭ ءتۇسىن وزگەرتىڭىز. بۇگىنگى ءساننىڭ ىقپالىندا ەمەس، ءوز قالاۋىڭىزشا كيىنە ءبىلىڭىز.
ەشكىمگە كورسەتپەيتىن سەزىمدەرىڭىزدى سىرتقا شىعارىڭىز. ءوزىڭىزدى شامامەن ءبىر ساعاتقا ەركىندىككە جىبەرىڭىز. وسى ءبىر ساعاتتىڭ ىشىندە ويىڭىزعا نە كەلسە، سونىڭ ءبارىن جاساڭىز. قىسىلماستان ايعايلاڭىز، سەكىرىڭىز، ءان سالىڭىز، ويناڭىز...
تۇيسىكتى تىڭداي ءبىلىڭىز. وزىڭىزگە مەديتاتسيا ءتۇرىن (مۇسىلماندار ءۇشىن ناماز) تاڭداپ الىڭىز. ىڭعايلى جايعاسىپ، بوساڭسۋدى ۇيرەنىڭىز. بۇل الەمدە ءسىز جوقسىز دەپ ەسەپتەڭىز. ساناڭىزداعى ساپىرىلىسقان ويلارىڭىزدى باقىلاڭىز. سىرتىنان عانا قاداعالاپ وتىرىڭىز. نەمەسە تابيعات تۋرالى اۋەزدەردى تاڭداپ الىپ، تابيعاتپەن كىرىگىپ كەتەرلىكتەي سەزىمگە بوي الدىرىڭىز.
ءوز مەنىڭىزدى ساقتاڭىز. قوعامدىق پىكىرگە ىلەسە بەرمەي، ءوز ويىڭىزدى اشىق ايتىپ ۇيرەنىڭىز. بوتەننىڭ قۇندىلىعىن انىقتاي ءبىلىڭىز، ونى وزىڭىزگە تاڭۋعا جول بەرمەڭىز، سىرتقى ستەرەوتيپتەرگە بوي الدىرماڭىز. ونىڭ ءبارىن تىس قالدىرىڭىز دا، ءوزىڭىزدىڭ ىشكى جان دۇنيەڭىزگە ءۇڭىلىڭىز، جان سۇلۋلىعىڭىزعا ءمان بەرىڭىز. ويتكەنى، ءسىز ەرەكشە ادامسىز، ەشقاشان ءوزىڭىزدى ءوزىڭىز قايتالامايسىز. وزگەگە ەلىكتەمەڭىز، ءوزىڭىزدىڭ مەنىڭىزدى ولاي ولتىرمەڭىز.
ءوزىڭىزدى سەزىنە ءبىلىڭىز. ءار ءتۇرلى جاعدايدا، بوگدە جەرلەردە، سان ءتۇرلى وقيعالار كەزىندە... ءوزىڭىز نە سەزەتىنىڭىزدى، اينالا قالاي اسەر ەتەتىنىن ءبىلىپ ءجۇرىڭىز. ءوزىڭىزدى - قورشاعان ورتانىڭ ءبىر بولشەگى رەتىندە، قورشاعان ورتانى - ءوزىڭىزدىڭ ءبىر بولشەگىڭىز رەتىندە قاراڭىز.
ءوزىڭدى ءسۇي. سىزدە تەك ءسىز بارسىز. ءار ادام ءوزىن جاقسى كورە ءبىلۋى وتە ماڭىزدى. كەمشىلىكتەردى ويلاپ تابا بەرمەي، قانداي بولساڭىز، سول كۇيى ءوزىڭىزدى قابىلداپ، جاقسى كورىڭىز.
ءار كۇنىڭىزدى ەڭ سوڭعى كۇندەي كورىڭىز. بەس كۇندىك دۇنيە جالعان ەكەنىن استە ەستەن شىعارماڭىز. بالكىم، بۇگىنگى كۇن جەر بەتىندەگى ەڭ سوڭعى كۇن شىعار؟ ! باسقا قالاداعى تۋىسقانىما بارا جاتقاندا جول بويىندا اپاتقا كۋا بولدىم. ءۇش كولىك سوعىسىپ قالىپتى. ەكەۋى قارسى كەلىپ سوعىسىپ قالسا كەرەك. وسى اپاتتا ورىمدەي جاس قىز قايتىس بولدى. وسىنى كورگەن كەزدە ويىما ءبىر عانا نارسە كەلدى: «ءومىر سۇرۋگە اسىعۋ كەرەك!» بۇل نەنى مەڭزەيدى؟ اينالاعا قاراڭىزشى! ادامدار تىم قارابايىر ءومىر سۇرەدى. ءوز قالاۋىنا ىنتىقپايدى. ولار باسقاشا ويلايدى. ەل نە دەيدىدەن اسا المايدى. «قازىر قىزىق بولماسا، ءبىراز ۋاقىتتان سوڭ ءبارى وزگەرەر...» دەپ كۇتەدى.
نەمەسە «بۇگىنىمدى وتباسىما، دوستارىما، جۇمىسىما ارناسام، سوسىن ءوزىم ءۇشىن ءومىر سۇرەمىن» دەيدى. ناتيجەسىندە نە بولماق؟ ەرتەڭ ءولىپ كەتسە، ءوزى ءۇشىن ءبىر كۇندە ءومىر سۇرمەگەن بولىپ شىقپاي ما؟ ءومىرىن ەرتەڭگە قالدىرىپ ءجۇرىپ... ءوزى ءۇشىن ەمەس، وزگەلەر ءۇشىن ءومىر ءسۇردى. ال، ەرتەڭنىڭ بولماي قالاتىنىن ەسكەرمەيدى. ءومىردى بۇگىن ءسۇر. ەڭ باستىسى وسى.
ءوزىڭىزدى كورسەتە ءبىلىڭىز. ءار جۇمىسقا شىعارماشىلىق كوزقاراستا بولىڭىز. سوندا وزىڭىزگە دە ول جۇمىس ۇناي باستايدى.
قۋانۋعا اسىعىڭىز. ءتىپتى بولماشى نارسەگە دە. جەڭىلىستەرگە دە قۋانا ءبىلۋ ماڭىزدى. ويتكەنى، ءار جەڭىلىس بىزگە ساباق. كەلەسى ءبىر وسىنداي وقيعادا جەڭۋگە مۇمكىندىك بەرەدى. وتكەن شاقتاعى ءاربىر قاتەلىكتى سوندا قالدىرىڭىز. ەستە ساقتاپ جۇرسەڭىز، ولاردى قايتا سەزىنەمىن دەپ قازىرگى بۇيىرعان ءومىردىڭ ساتتەرىن وتكىزىپ الاسىز. ءار ادام باقىتتى بولۋ ءۇشىن تۋادى. بۇل ادامزاتتىڭ ماڭدايعا جازىلعانى. نەگە ءبىز سونى ۇمىتتىق؟ نەگە قاپالى ادامدى كورۋ قالىپتى جاعدايدا، ال قۋانىشتى، باقىتتى ادامداردى كورسە، جۇرت ولارعا ەسى اۋىسقاندارعا قاراعانداي قارايدى؟
تاڭدانۋعا اسىعىڭىز. ءومىردىڭ تاماشاسىنا، تابيعاتتىڭ عاجابىنا. كۇرت توقتاڭىز دا، اينالاعا ءبىر ءسات كوز سالىڭىزشى. ويىڭىزدى توقتاتىڭىز. كۇلىمسىرەڭىز.
دۇنيە دۇرمەكتىڭ عالاماتىن سەزىنىڭىز، ادام بولىپ ءومىر ءسۇرۋدىڭ ءوزى ءبىر عانيبەت ەمەس پە؟ قالاي عانا تاڭدانباۋعا بولادى؟
يۋليا دجۋمم
اۋدارعان شىنار ءابىلدا
