قىتايلىق ستۋدەنتتەر قازاقشا مۋلتفيلم ءتۇسىردى
«اققۇس» مۋلتفيلمىن قىتاي كوممۋنيكاتسيا ۋنيۆەرسيتەتىنىڭ (Communication University of China) تۇلەكتەرى ديپلومدىق جۇمىستارىنا تۇسىرگەن. فيلمنىڭ سەنارييىن گو زىحاو ەسىمدى قىتاي ستۋدەنتى جازىپ، ونى وقۋ ورنىن اياقتايتىن ءتورت كۋرستاسىمەن بىرگە تۇسىرگەن. ال مۋلتيپليكاتسيالىق فيلمدى قازاق تىلىنە اۋدارۋ جانە كەيىپكەرلەردى دىبىستاۋ ماسەلەسىندە ستۋدەنتتەر شىڭجاڭنىڭ قازاقتار مەكەندەپ وتىرعان التاي قالاسى تەلەكانالىنىڭ كومەگىنە جۇگىنگەن.
گو زىحاونىڭ ايتۋىنشا، ۇلتى قىتاي بولعانىنا قاراماستان، بەيجىڭ قالاسىنا كەلگەن وسى ۋاقىتتا تۋعان جەرى التايدىڭ تەرەڭ تاريحى مەن قازاقتاردىڭ تۇرمىس- تىرشىلىگى ءوزىنىڭ ومىرىنە ۇشان- تەڭىز وزگەرىس الىپ كەلگەن. ول اققۇس ارقىلى قازىرگى كەزدەگى قىتايداعى قازاق جاستارىنىڭ جان- دۇنيەسىن كورسەتۋگە تىرىسقان. 
مۋلتفيلم 14 مينۋتقا سوزىلادى. وندا اققۇس اتتى قالادا ءوسىپ، تاعدىردىڭ جازۋىمەن كىشكەنتايىنان اناسى مەن اكەسىنىڭ ايالى الاقانىن بىردەي سەزىنبەگەن قازاق قىزىنىڭ اناسى دۇنيەدەن وزعاننان كەيىن، جايلاۋعا كەلىپ، بالا كەزىنەن بىرگە تۇرماعان اكەسىمەن قارىم- قاتىناس ورناتۋى باياندالادى. جايلاۋداعى ءومىر ارقىلى كورەرمەنگە قازاقتىڭ سالت- داستۇرلەرى كورسەتىلەدى. «اققۇس» Tencent ۆيدەو پورتالىنا 20 - ماۋسىم كۇنى جۇكتەلىپ، وسى ۋاقىتقا دەيىن ول 2 ميلليوننان استام رەت قارالعان.
اۆتور: مۇحتار قاليموللا ۇلى
