بەيسەن قۇرانبەك «ايتۋعا وڭاي» باعدارلاماسىنىڭ نەگە جابىلعانى بەلگىلى بولدى
بۇل تۋرالى باعدارلاما جۇرگىزۋشىسى، جۋرناليست بەيسەن قۇرانبەك پەن ۇجىم قىزمەتكەرلەرى جەلىدەگى پاراقشالارىندا جازدى.
«ءيا، «ايتۋعا وڭاي» اياقتالدى. تامىزدىڭ سوڭىنا دەيىن قايتالاۋلار بەرىلەدى. سونىمەن ءبىتتى...
بەس جىلدىڭ ىشىندە قوعامداعى قوردالانعان پروبلەمالار، قيۋى كەتىپ تۇرعان الەۋمەتتىك- تۇرمىستىق ماسەلەلەر، تالايلى تاعدىرلار تۋرالى ايتۋداي- اق قايتتىق. ءجاي عانا ايتىپ قويماي، قولدان كەلگەنشە سۇرىنگەنگە- سۇيەۋ، جىعىلعانعا - جاستىق بولدىق.
وسىلاي جالعاستىرا بەرسەك تە بولاتىن ەدى. قالىپتاسقان، ەلدىڭ كوڭىلىنەن ورىن تاپقان برەند، فورماتتى ارى قاراي دا قولدانا بەرۋگە بولاتىن ەدى. ءبىراق ءار نارسەنىڭ ۋاقىتى بار، ءار نارسەنىڭ ولشەمى بار. ودان كەيىن قايتالاۋ، ۇساقتالۋ، كەرى كەتۋ باستالاتىنى بەلگىلى.
جەكە ءوزىم ءۇشىن دە بۇل شەشىم وڭايعا تۇسكەن جوق. قۇداي ءومىر بەرسە ساعىنىشپەن ەسكەن الاتىن ءبىر كەزەڭ ارتتا قالىپ بارادى. مەن ءۇشىن «ايتۋعا وڭاي» ۇيرەنۋ، ءوسۋ، قىزمەت ەتۋ مەكتەبى بولدى. كوپ نارسە جازعىم كەلەدى. ول ەندى ماقتانداي قابىلدانۋى مۇمكىن ەكەنىن ەسكەرىپ، قويا- قويعان ءجون بولار.
ءبىراق بۇگىن ءبىر نارسە ايتىلۋى ءتيىس. ول - العىس!
- وسى جوبانى ومىرگە اكەپ، بىزگە سەنىم ارتقان، قولداۋ بىلدىرگەن نۇرجان جالاۋ قىزىنا، ءلاززات ولجاباي قىزىنا، قاينار ولجايعا، سەرىك ابباس- شاحقا،
- مەنى جۇرگىزۋشىلىككە شاقىرعان «ايتۋعا وڭايدىڭ العاشقى ءارى سوڭعى پروديۋسەرى ءاليا قۇدايبەرگەنگە،
- «ايتۋعا وڭايعا» ءار كەزدەرى جەتەكشىلىك ەتكەن ارگەنتينا جانىبەككە، ەركە بايجىگىتوۆاعا، دوسان اتانتەلوۆكە، ءنۇسىپحان قىستاۋبايەۆقا،
- «ايتۋعا وڭايدا» ىستەگەن ءاربىر قىزمەتكەرگە،
- دەمەۋشىلىك، تىلەكتەستىك تانىتقان ءاربىر ادامعا،
- از ۋاقىت باسشىلىق ەتسە دە، كوپ قولداۋ بىلدىرگەن كەمەلبەك ويشىبايەۆقا،
- بىزگە ەرەكشە سەنىم تانىتىپ، جۇمىسقا بارلىق جاعدايدى جاساپ وتىرعان ەرلان كارين باستاعان «قازاقستان» تەلەراديوكورپاراتسياسىنىڭ باسشىلىعى مەن ۇجىمىنا،
- اعالىق اقىلى، اپكەلىك قامقورلىعى، ارىپتەستىك جاناشىرلىقتارى ءۇشىن ۇلتتىق ارنانىڭ الماتى فيليالىنىڭ جەتەكشىسى مارات يمانعالي ۇلىنا، باس رەداكتور گۇلنار سالىقبايعا، شەف - رەداكتورلار ساعاتبەك قالي ۇلىنا، ەرجانار اشەيحانعا، داۋرەن داريابەككە، جانار بايسەمىزوۆاعا، زەينەپ تۇراربەك قىزىنا، ازات رىستانبەكوۆكە،
- وزدەرى كورىنبەي، ۇلكەن ىستەردى تىندىرىپ جۇرگەن رەجيسسەرلارعا، دىبىس رەجيسسەرلارىنا، وپەراتورلارعا، جارىق قويۋشىلارعا، مونتاجەرلارعا، شوپىرلارعا، تەحنيكالىق، شارۋاشىلىق، ۇيىمداستىرۋ ءبولىمىنىڭ بارشا قىزمەتكەرىنە، تاعى دا باسقا اتى اتالماعان، ءبىراق سەپتىگى تيگەن جاندارعا.
زور العىس سەزىمىن بىلدىرەمىن!
سىزدەرسىز بۇل حابار شىقپاس ەدى...
ەرەكشە راحمەت ايتاتىن، ول - نۇرتىلەۋ اعام ايتپاقشى، «پاتشا كوڭىلدى كورەرمەن». سىزدەردىڭ بىزگە ۋاقىت، كوڭىل بولگەندەرىڭىز ءۇشىن، بەي- جاي قاراماي ىقىلاس، نيەت تانىتقاندارىڭىز ءۇشىن
مىڭ العىس!
سىزدەرسىز ءبىزدىڭ جاساعان حابارىمىز ەشكىمگە كەرەكسىز بوپ قالار ەدى...
ارى قاراي نە بولادى دەيسىزدەر عوي. قاراپ وتىرمايمىز. قارەكەت قىلامىز. ەلگە پايدالى دۇنيە جاسايمىز. «ۇلتتىق ارناداعى» جاڭعىرۋ كەزەڭىنە ءوز ۇلەسىمىزدى قوسامىز.
ول تۋرالى جاڭا ماۋسىمدا كورىپ، باعاسىن بەرە جاتارسىزدار»، - دەپ جازدى باعدارلاما جۇرگىزۋشىسى بەيسەن قۇرانبەك.
«ايتۋعا وڭاي باعدارلاماسىنىڭ پروديۋسەرى ءاليا قۇدايبەرگەنوۆا جوسپارلانىپ وتىرعان جاڭا باعدارلاما جايلى ايتتى.
«ايتۋعا وڭاي...» تاريح قويناۋىنا كەتتى... بەس جىلدىق عۇمىرى قادىرلى، ارداقتى بولدى دەپ ويلايمىن. قانشا العىس، قانشا ساۋاپ جيدى. تالايعا ءۇمىت بەرىپ، قانشا شاڭىراققا شاتتىق سىيلادى.
جەتىمگە پانا، جەسىرگە دەمەۋ، السىزگە قۋات بولا ءبىلدى. شارشادىق دەمەدىك، ءار كەيىپكەرىمەن قوسىلا جىلادىق. بالا بەس جاسقا كەلگەندە ەسىن جيىپ، وڭى مەن سولىن تاني باستايدى. «ايتۋعا وڭاي...» دا سولاي. جاقىندا «ءىنىسى» دۇنيەگە كەلەدى! اتى «قارەكەت». مازمۇنى، ءمانى تۋرا باياعىداي، تەك بۇل جولى باياعىداي سىرتتان عانا قاراپ قويماي، ىشكە ەنەمىز، تەرەڭ زەرتتەپ، زەردەلەيمىز.
ال «قارەكەتىمىز» ەلدىڭ جۇرەگىنەن ورىن الىپ، قازاقتىڭ ءار شاڭىراعىندا ءومىر ءسۇرسىن! قازىر «قارەكەتكە» قارەكەت ەتۋدەمىز. سەنىم ارتقان باسشىلىققا العىس. ۇجىمعا اللا قۋات بەرسىن. قىركۇيەك ايىنان باستاپ ەفيرگە شىعادى. جۇرگىزۋشىسى بەيسەن قۇرانبەك»، - دەپ جازدى «ايتۋعا وڭاي» باعدارلاماسىنىڭ پروديۋسەرى ءاليا قۇدايبەرگەنوۆا.
