وڭتۇستىك قازاقستاندا سوتتالعاندار نەسيە الا الادى
اۋداننىڭ دەنساۋلىق ساقتاۋ، كاسىپكەرلىك سالالارى مەن كوشى- قون جونىندەگى ۋاكىلەتتى مەملەكەتتىك ورگاندار قىزمەتكەرلەرىنىڭ قاتىسۋىمەن وتكەن باسقوسۋدا جازاسىن وتەپ جاتقانداردى جۇمىسپەن قامتۋ ماسەلەسى تالقىلاندى.
كەزدەسۋ بارىسىندا سوتتالعانداردان الەۋمەتتىك جانە وزگە دە ماسەلەلەر جونىندە ساۋالدار قويىلدى. ونىڭ ىشىندە كاسىپكەرلىك قىزمەتىن جۇزەگە اسىرۋعا جەڭىلدەتىلگەن نەسيە الۋ، جۇمىسقا ورنالاسۋ، جەكە باسىن انىقتايتىن قۇجاتتاردى قالپىنا كەلتىرۋ جايى ءسوز بولدى. ماسەلەن، پروباتسيا ەسەبىندە تۇراتىن د ەسىمدى ازامات مال بورداقىلاۋعا جەڭىلدەتىلگەن اۋىلشارۋاشىلىعى نەسيەسىن الۋعا كومەك بەرۋ تۋرالى ءوتىنىش جاسادى. جيىندا بۇل ءوتىنىش بويىنشا سايرام اۋداندىق كاسىپكەرلىك جانە اۋىل شارۋاشىلىعى ءبولىمىنىڭ ماماندارى سوتتالعان تۇرعىننىڭ 4 ميلليون تەڭگە كولەمىندە نەسيە الۋعا ءوتىنىمىن قابىلداۋعا شەشىم شىعاردى. بۇدان بولەك، سوتتالعاندار ك. جانە ن ەسىمدى ازاماتتار كاسىپكەرلىك ءبولىمى ارقىلى كاسىپتىك دايارلاۋ كۋرستارىنا جىبەرىلىپ، ونى اياقتاعاننان كەيىن جۇمىسقا قابىلداناتىندارى بەلگىلى بولدى.
باسقوسۋدا پروكۋراتۋرا سوتتالعانداردىڭ قۇقىقتارىن تۇسىندىرە كەلە، ۋاكىلەتتى مەملەكەتتىك ورگاندارعا ءىستى بولعانداردىڭ جۇمىسقا ورنالاسۋى جانە جەكە باسىن انىقتاۋ قۇجاتتارىن قالپىنا كەلتىرۋ ماسەلەلەرى بويىنشا ىقپال جاساۋعا ءتيىستى ۇسىنىستار بەردى.
