سولتۇستىك قازاقستاندىقتار قاتەرلى ىسىك قاۋپىن موبيلدىك قوسىمشا ارقىلى انىقتاي الادى
ناۋقاسقا باعدارلانعان موبيلدىك رەسۋرستى جاساۋ يدەياسى كارديولوگيالىق ورتالىقتىڭ رەنتگەن- حيرۋرگى دميتري تيوعا تيەسىلى.
ول كارديولوگيادان بولەك، ءۇش جىل قاتارىنان اسقازان قاتەرلى ىسىگىنىڭ سكرينينگىمەن اينالىسىپ كەلەدى. دارىگەر وسى جىلدار ىشىندە ادامدار قاتەرلى ىسىك سكرينينگىنەن ۇرەيلەنەتىنىن جانە ولاردىڭ ونكوسىرقاتتار جايلى حابارى ازدىعىنا كوزى جەتكەن.
«سكرينينگىلىك توپتارعا جاتاتىندار اراسىندا تۇسىنىسپەۋشىلىك كەزدەسەدى، كەيدە ولار تەكسەرۋدەن وتۋگە ءۇزىلدى-كەسىلدى باس تارتادى. شەتەلدە مۇنداي جوق. وندا ساقتاندىرۋ مەديتسيناسى وتە قىمبات جانە ادامدار دەر ۋاقىتىندا تەكسەرىلۋ اسقىنعان جاعدايلاردى ەمدەۋگە قاراعاندا ارزان ەكەندىگىن ءجىتى تۇسىنەدى. قوسىمشانى جاساپ شىعارۋ يدەياسى جۇرەك اقاۋلارىمەن قوسا، ونكولوگيا تۇيتكىلدەرىن زەرتتەۋ ءۇشىن ءارتۇرلى ەلدەردىڭ كلينيكالارىندا بولعان كەزىمدە كەلدى. مۇنداي قوسىمشالار شەتەلدە سۇرانىسقا يە. ناۋقاستار ءۇشىن سيفرلى موبيلدىك باعدارلامالاردىڭ كوپتەگەن سەرۆيستەرى بار. بۇل دارىگەرگە دە، ناۋقاسقا دا وتە ىڭعايلى ءارى ءتيىمدى»، - دەپ اتاپ ءوتتى دميتريي تيو.
يدەيانى ءىس جۇزىنە اسىرۋعا NEP (New Economic Platform) كومپانياسى كومەكتەسكەن. ول دارىگەردى مەديتسيناداعى اۆتورلىق ازىرلەۋشىلەردىڭ كومانداسىنا شاقىرعان. رەسۋرستى جاساپ شىعارۋ اعىمداعى جىلدىڭ مامىر ايىندا باستالدى.
دميتريي تيونىڭ ايتۋىنشا، س ق و اكىمى جوباعا قىزىعۋشىلىق ءبىلدىرىپ، وعان قولداۋ كورسەتكەن. «ونكوسكرين» قوسىمشاسى ماۋسىم ايىندا «حاكاتون-2017» بايقاۋىنا قاتىستىرىلىپ، ەكىنشى ورىندى يەلەندى. جوبانى ازىرلەۋشىلەر تۇركيادا تاعلىمدامادان وتۋگە گرانت الدى.
قوسىمشا Play Market-كە قىركۇيەك ايىندا ەنگىزىلەدى. ىلكى جوبا ازىرگە سولتۇستىك قازاقستاندىقتار ءۇشىن عانا قولجەتىمدى. كەيىن ونى وزگە ءوڭىردىڭ تۇرعىندارى پايدالانا الاتىن بولادى.
