كەتي توپۋريا: قازاق ءانىن ەستىگەندە تۇلا بويىم شىمىرلاپ كەتتى

ارتىستەر ەلگە بەلگىلى حيت اندەرىن ورىنداپ، توپتىڭ ومىردەن وزعان بۇرىنعى مۇشەلەرى - باتىرحان شۇكەنوۆ پەن بولات سىزدىقوۆقا ارناپ بلوك-شوۋ جاساماق.

بۇل تۋرالى Sputnik حابارلادى.

«ءان كەشىندە «ەسكە الۋ» دەپ اتالاتىن ءبولىم بولادى. كورەرمەندەرگە، اسىرەسە جاس بۋىنعا ەسكى اندەرىمىزدى ەسكە سالساق دەيمىز. ءبىز ولاردى «90-جىلدارداعى ا- ستۋديو» دەپ اتايمىز. ساحنادا باقىتتى كەزەڭدەردى بىرگە وتكەرگەن دوستارىمىزدى - باتىرحاندى، بولات پەن باعلاندى ەسكە الساق دەگەن نيەتىمىز بار... ارينە، بۇل جانتەبىرەنتەرلىك ءسات بولادى»، - دەدى توپتىڭ نەگىزىن قالاعان مۋزىكانت بايعالي سەركەبايەۆ استانادا جانكۇيەرلەرمەن كەزدەسۋ بارىسىندا.

توپتىڭ مەرەي تويىنا ارنالعان «سيلا مۋزىكي»  اتتى كونسەرت 15-20- تامىز ارالىعىندا كونگرەسس- ورتالىقتا وتەدى. مۋزىكانتتار كۇنىنە ەكى كونسەرتتەر بەرمەك: ساعات 18.00 دە جانە 21.00 دە.

بايعالي سەركەبايەۆ توپتىڭ ەل بىلمەيتىن قۇپياسىن اشىپ قويدى. ايتۋىنشا، توپ الداعى ۋاقىتتا قازاق تىلىندە البوم شىعارماقشى ەكەن.

«ءبىر جولى باتىرمەن بىرگە قازاقشا ءان جازدىرعانىم ەسىمدە. قاتتى تاڭىرقاپ قالدىم. ەكى ساعاتتىڭ ىشىندە اجەپتەۋىر قينالىپ قالدىق. ەشقاشان ستۋديادا وسىنشا كوپ ۋاقىت وتكىزىپ كورمەپپىن. دايىن جازبانى تىڭداپ بولعان سوڭ ول ماعان: «جامان ەمەس، بولادى»، - دەدى. الايدا بۇل وتە قيىن»، - دەيدى توپ مۇشەسى كەتي توپۋريا.

كەتيدىڭ ايتۋىنشا، مۋزىكا جەرگىلىكتى ايماققا عانا ارنالماۋى كەرەك. مۋزىكا - الەم ەلدەرىن بىرىكتىرۋى ءتيىس.

ال كونسەرتتىڭ قويۋشى- رەجيسسەرى ۆياچەسلاۆ كۋلايەۆ الدا وتەتىن شوۋدان كورەرمەندەردىڭ مول شابىتقا كەنەلەتىنىن ايتىپ، ۋادە بەردى. ول ءتىپتى، ءار كورەرمەننىڭ شوۋدىڭ قاتىسۋشىسى بولا الاتىنىن الدىن الا ەسكەرتتى.

مۋزىكانتتاردىڭ ايتۋىنشا، قايىرىمدىلىق ءىسى اياسىندا 2 مىڭعا جۋىق بيلەت بالالار ءۇيىنىڭ تاربيەلەنۋشىلەرىنە بەرىلىپتى.

«ءبىزدىڭ مۋزىكامىزدى وسكەلەڭ ۇرپاق بىلسە دەيمىز. كونسەرتتە بۇلدىرشىندەردى كورسەك، قۋانامىز»، - دەپ اتاپ ءوتتى بايعالي سەركەبايەۆ.

«ا-ستۋديو» توبىنىڭ ايتۋىنشا، استانادا وتەتىن شوۋ توپ تاريحىنداعى ەڭ ءىرى ءان كەشى بولماق. ونى ۇيىمداستىرۋعا 300 ادام جۇمىلدىرىلىپتى.

«مەرەي تويدى وتانىمىزدا اتاپ ءوتۋ - ول ناعىز باقىت»، - دەيدى مۋزىكانتتار.

«ءبىز وسىندا دۇنيەگە كەلدىك، قانشاما ەستەلىكتەر بار. الماتىدا تۇردىق، ونىڭ ءار بۇرىشىن جاتقا بىلەمىز. ونىڭ بارلىعى ماڭگىلىككە ءبىزدىڭ جادىمىزدا قالادى»، - دەيدى توپتىڭ نەگىزىن قالاۋشىلاردىڭ ءبىرى ءارى باس- گيتاراشى ۆلاديمير ميكلوشيچ.

ال كەتي توپۋريا قازاقستاندى ءۇشىنشى وتانى سانايتىنىن اتاپ ءوتتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى