جۇدىرىعى مىقتى، تالابى تاۋداي دينا
شاعىن عانا اۋىلدان تۇلەپ ۇشقان بىلعارى قولعاپ شەبەرى، جۇدىرىعى مىقتى، تالابى تاۋداي، ارمانى اسقاق.
دينا جاقسى كەنتىنىڭ تۋماسى، دەپ حابارلايدى قازاقپارات ءتىلشىسى.
دينا جولامان - بىلتىر استانا قالاسىندا ريو-دە-جانەيروداعى جازعى وليمپياداعا جولداما ساراپقا سالىنعان سايىستا التىن مەدالدى جەڭىپ الىپ، الەم چەمپيونى اتانعان قارشاداي قازاق قىزى. 67 ەلدەن 285 بوكسشى قاتىسقان وسى ءدۇبىرلى دودادا 54 كەلى سالماق دارەجەسىندە سايىسقا تۇسكەن اقمولالىق سپورتشى قارسىلاستارىنىڭ ءبارىن جەڭىپ، الەم چەمپيونى اتاندى.
ايەلدەر اراسىنداعى بوكس بۇگىندە وليمپيادالىق ويىندار تىزىمىنە ەنگەن سپورتتىڭ ەڭ تانىمال ءتۇرى بولىپ سانالادى. دينانىڭ بوكستاعى جولى جاقسى كەنتىندەگى «ت ن ك اگروفيرماسىنىڭ» قولداۋىمەن اشىلعان ت. ۋاليەۆ اتىنداعى سپورت مەكتەبىندە باستالعان. قىزداردىڭ اۋىر اتلەتيكا، بوكس سياقتى ۇلكەن كۇشتى قاجەت ەتەتىن سپورت تۇرلەرىمەن اينالىسۋى بۇگىندە ەشكىمنىڭ تاڭدانىسىن تۋدىرمايدى.
سودان بولار، ونىڭ بوكسپەن اينالىسقانىنا تۋعان- تۋىستارى دا قارسى بولا قويماعان. سپورتشىنىڭ الەم چەمپيونىنا دەيىنگى جولى بىردەن جانە كەزدەيسوق سامعاۋ ارقىلى ەمەس، ساتىلاپ وسۋمەن جانە كوپ تەر توگە وتىرىپ جاتتىعۋدىڭ ارقاسىندا كەلدى. ول بۇل تابىسقا جەتۋدە ءوزىنىڭ باپكەرى، حالىقارالىق دارەجەدەگى سپورت شەبەرى الەكساندر ۆىسوسكيدىڭ سىڭىرگەن ەڭبەگىنىڭ زور ەكەندىگىن ەشقاشان ۇمىتپايدى.
ەكى دۇركىن رەسپۋبليكا چەمپيونى بولعان دينا 2014 -جىلى وڭتۇستىك كورەيادا وتكەن حالىقارالىق جارىستا بەسىنشى ساتىدان كورىنىپ، بولاشاعىنان ۇلكەن ءۇمىت كۇتتىرەتىن سپورتشى ەكەنىن كورسەتتى. مۇنداي ءدۇبىرلى جارىسقا العاش قاتىسقان جاس سپورتشى ءۇشىن بۇل از تابىس ەمەس. سونداي-اق، بۇل جەتىستىك وعان حالىقارالىق دارەجەدەگى سپورت شەبەرى اتاعىن الۋعا ىقپالىن تيگىزدى.
استانادا وتكەن جارىسقا قايتا ورالساق، بۇل - ءدال وليمپيادا ويىندارى قارساڭىندا وتكەن اسا جاۋاپتى دا كۇردەلى سىن بولعان ەدى. جارىس جۇلدەگەرى وليمپياداعا جولداما دا الۋى ءتيىس- ءتىن. سوندىقتان سپورتشىلار جەڭىس ءۇشىن جانىن سالىپ باقتى.
دينانىڭ قارسىلاستارى تالاي جارىستاردا توپ جارعان كىل مىقتىلار بولدى. دەگەنمەن، ولاردىڭ اتاق- داڭقى، بۇرىنعى جەڭىستەرى جاس بوكسشىنىڭ بويىنا ۇرەي ۇيالاتا قويعان جوق. نەمىس سپورتشىسى ورنەلەي ۆاحنەردى 3:0 ەسەبىمەن ۇتقان ول قىتايلىق ايا شينماتونى دا سونداي ەسەپپەن تىزە بۇكتىردى. فينالدا تاعى ءبىر قىتايلىق ليۋ پياپيا ونى دا 3:0 ەسەبىمەن انىق باسىمدىقپەن جەڭدى.
ءسويتىپ، ەلىمىز تاريحىندا ايەلدەر اراسىندا ەكىنشى الەم چەمپيونى اتاندى. وكىنىشكە وراي، دينا ريو- دە- جانەيرودا وتەتىن وليمپياداعا بارا المادى. ويتكەنى، ونىڭ سالماعى وليمپيادا ويىندارىنا كىرەتىن سالماق ولشەمىنە ەنبەدى. وليمپيادادا ايەلدەر بوكسىندا ءۇش سالماق - 51, 60 جانە 75 كەلى سالماقتارى عانا قاراستىرىلعان. دەگەنمەن، بۇل جاسىنداي جارقىراپ، بيىككە ۇمتىلعان تالانتتى سپورتشىنىڭ جولىندا توسقاۋىل بولا المايدى. ونى الدىندا ءالى دە تالاي ءدۇبىرلى جارىستار كۇتىپ تۇر.
اۆتور: اسلان وسپانوۆ
