اجىمنەن قۇتىلعىڭىز كەلسە
ال 20 جاستان اسقاندا ءاجىم كوزدىڭ اينالاسىنا تۇسە باستايدى. وكىنىشكە وراي ادام جاسى ۇلعايعان سايىن ءاجىم دە تەرەڭدەي تۇسەدى ءارى بەتتىڭ ءارىن كەتىرەدى. ءاجىم ءارتۇرلى سەبەپتەردەن پايدا بولادى. ال ودان قالاي قۇتىلۋعا بولادى؟ ول ءۇشىن نە ىستەۋ كەرەك؟ سىزدەرمەن بىرگە وسىنىڭ جاۋابىن قاراستىراتىن بولامىز.
ءاجىمدى كەتىرۋدىڭ بىردەن ءبىر جولى - ۋاقىتتى وتكىزىپ الماي، دەر كەزىندە ارەكەت جاساۋ. ەڭ الدىمەن اجىمدەردى قاراپايىم تۇزبەن كەتىرىپ كورىڭىز. ول ءۇشىن 1 شاي قاسىق تۇزدى 1 ستاقان سۋعا سالىپ ارالاستىرىڭىز. دايىن بولعاندا تۇزدى سۋعا ماقتانى مالىپ، بەتكە جانە مويىنعا قويىڭىز. وسىلايشا ماقتانى بەتتە بىرنەشە مينۋت ۇستاڭىز. جاي عانا سىرتىنان ۇرعىلاپ وتىرۋىڭىزعا بولادى.
ماڭدايعا تۇسكەن ءاجىمدى جۇقا قاعاز ارقىلى كەتىرۋگە بولادى. پەرگامەنت نەمەسە كالكا سىندى جۇقا قاعازدى الىپ، وعان كرەم جاعامىز دا ماڭدايعا جابىستىرىپ قويامىز. قاعازدىڭ سىرتىنان داكەمەن وراپ، بايلاپ قويۋعا دا بولادى. بۇل ەمدىك ءتاسىلدى 20 مينۋت بويى جاساپ، 5 كۇن قايتالاۋ كەرەك. بىرنەشە اپتا وتكەننەن كەيىن اجىمدەردىڭ جازىلىپ، ازايا باستاعانىن بايقايسىز. الايدا 35 جاستان اسقان ايەلدەر وسىنداي ارەكەتتى جاساپ كورگەننەن كەيىن مىندەتتى تۇردە پارافيننەن ەم جاساۋ قاجەت. پارافين كۋرسىن جىلىنا بىرنەشە رەت جاساساڭىز، اجىمنەن قۇتىلاسىز.
ماڭدايداعى اجىمنەن ارىلۋدىڭ تاعى ءبىر جولى - ماڭداي بۇلشىق ەتتەرىنە جاتتىعۋ جاساۋ. ماڭدايىڭىزدى تىجىرماي، قاباعىڭىزدى تومەن ءتۇسىرىڭىز. كەرىسىنشە شەكەڭىزدى جوعارى كوتەرىپ، وسىلايشا كۇن سايىن جاتتىعۋ جاساپ تۇرىڭىز. جاتتىعۋدىڭ اسەرى جاقسى بولۋ ءۇشىن، شەكەنى، قاباعىڭىزدى قيمىلداتقاندا اجىمدەردى قولمەن ۇستاپ تۇرۋ قاجەت.
بەتتەگى ءاجىمدى كەتىرۋدىڭ بىردەن- ءبىر جولى - ءوز-وزىنە ماسساج جاساۋ. ول ءۇشىن ساۋساقتىڭ ۇشىمەن بەتكە جاي عانا ماسساج جاساسا بولعانى. بۇل جاتتىعۋ بەت تەرىسىن قاتايتىپ، قاناينالىمدى جاقسارتادى.
ءاجىمدى كەتىرۋدىڭ تاعى ءبىر جولى - اجىمگە قارسى ماسكالار.
1. جۇمىرتقانىڭ سارىۋىزى مەن ماي قوسىلعان ماسكا. ەڭ الدىمەن مايسانا نەمەسە كامفورا مايىنان جارتى شاي قاسىق الىپ، جۇمىرتقانىڭ سارى ۋىزىمەن ارالاستىرۋ كەرەك. دايىن بولعان قوسپانى بەتكە جاعىپ، 10-15 مينۋتتان سوڭ جىلى سۋمەن جۋاسىز. بۇل ماسكا ەندى عانا ءتۇسىپ كەلە جاتقان اجىمدەردى كەتىرۋدە جاقسى كومەكتەسەدى.
2. اشىتقى ماسكاسى. قايماق پەن 25 گرام اشىتقىعا سۋ قوسىپ، بىرنەشە ساعاتقا قويۋ قاجەت. بەلگىلى ۋاقىت وتكەننەن كەيىن قايماق پەن اشىتقى قوسىلعان ماسكانى بەتىڭىزگە جاعاسىز. 20 مينۋتتان سوڭ جىلى سۋمەن جۋىپ تاستايسىز.
3. بال قوسىلعان ماسكا. جۇمىرتقانىڭ سارىۋىزى مەن 1 شاي قاسىق بال جانە 1 شاي قاسىق گليتسەريندى ارالاستىرىپ ماسكا جاساڭىز. ارتىنان جىلى سۋمەن بەتتى شايىپ تاستايسىز. بۇل ماسكانىڭ ءاجىمدى كەتىرۋدە پايداسى مول.
4. ليمون ماسكاسى. جۇمىرتقانىڭ سارى ۋىزىن الىپ كوپىرگەنشە قوزعاڭىز. ونىڭ ۇستىنە ليمون شىرىنىن جانە ءبىر شىمشىم تۇز قوسىڭىز. بارلىعىن جاقسىلاپ ارالاستىرىپ بەتكە جاعىڭىز. 15 مينۋتتان سوڭ جىلى سۋمەن بەتتى جۋىپ، ناتيجەسىنە كوز جەتكىزىڭىز.
