جەر سىلكىنگەندە نە ىستەۋ كەرەك؟

 ارىعا بارماي- اق، 9 - تامىز الماتى وبلىسىندا تاڭعى ساعات التىلار شاماسىندا بىرنەشە جەر سىلكىنىسى تىركەلگەنىن حابارلاعان بولاتىنبىز. وسىنداي توتەنشە جاعداي كەزىندە نە ىستەۋ كەرەگىن نازارلارىڭىزعا ۇسىنامىز.

ەڭ ءبىرىنشى - سابىرلى بولىڭىز، ۇرەيگە بوي الدىرماڭىز. ءبىراق جىلدام قوزعالۋىڭىز قاجەت. رەتسىز ءىس- قيمىل جاساعاندا وسىنداي ۇرەي تۋىندايدى.

ءۇيدىڭ ىشىندە:

سىلكىنىس كەزىندە دالاعا جۇگىرىپ شىعۋدى پاتەرىڭىزدىڭ قاي قاباتتا ورنالاسقانىنا قاراي شەشەسىز. ەگەر كوپ قاباتتى تۇرعىن ءۇيدىڭ ءبىرىنشى نەمەسە ەكىنشى قاباتىندا تۇراتىن بولساڭىز، سىرتقا شىعۋعا مۇمكىندىگىڭىز بار. ال ءۇشىنشى جانە ودان جوعارى قاباتتاردا تۇرساڭىز دالاعا شىعۋ وتە ءقاۋىپتى. سول سەبەپتى سىلكىنىس كەزىندە ءۇي ىشىندەگى قاۋىپتى جانە قاۋىپسىز جەرلەردى انىقتاپ العان ءجون.

ءۇي ىشىندە قالىپ قويساڭىز الدىمەن گاز، سۋ جانە جارىقتى ءسوندىرىڭىز؛

الدىن الا تاڭدالعان ورىنعا تىعىلىڭىز (مىسالى، مىقتى قابىرعا، بوساعا ەسىك جاقتاۋى، ۆاننا، توڭازىتقىش، پارتا، كەرەۋەت) ؛

تەرەزەگە جاقىنداماڭىز؛

جيھازداردان اۋلاق تۇرىڭىز؛

ليفت قىزمەتىن پايدالانباڭىز.

دالادا:

بيىك عيماراتتار مەن بيىك اعاشتاردان اۋلاق بولىڭىز؛

ۇزىلگەن سىمداردان اباي بولىڭىز؛

جەر استى وتكەلدەرىمەن جۇرمەڭىز؛

عيماراتتارعا كىرمەڭىز.

كولىكتە:

سىلكىنىس باستالعاندا دەرەۋ اشىق جەرگە توقتاڭىز؛

ءدۇمپۋ اياقتالعانشا كولىكتەن شىقپاي، ءبىر ورىندا وتىرىڭىز؛

ال قوعامدىق كولىك جۇرگىزۋشىسى مۇنداي جاعدايدا ەسىكتى اشىق قالدىرۋى ءتيىس.

جەر سىلكىنىسىنەن كەيىن:

سابىرلى بولىڭىز، زارداپ شەككەندەرگە كومەكتەسىڭىز؛

 راديوقابىلداعىشتى قوسىپ، جەرگىلىكتى بيلىك پەن ازاماتتىق قورعانىس ورگاندارىنىڭ نۇسقاۋلىقتارىنا قۇلاق ءتۇرىڭىز؛

قيراعان عيماراتتارعا كىرۋشى بولماڭىز؛

جاراقاتتانباۋ ءۇشىن مىقتى اياق كيىم كيىڭىز؛

قۇتقارۋ جۇمىستارىنا اتسالىسۋ كەرەك بولسا، قالىس قالماڭىز؛

باستىسى، ۇرەيگە جول بەرمەڭىز!

دايىنداعان: نازەركە ابيبۋللا

Baq.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى