ۇلتتىق بانك شەتەلدىك ۆاليۋتانىڭ قوزعالىسىن قاتاڭ باقىلاۋعا الادى

«ۆاليۋتالىق رەتتەۋ جانە ۆاليۋتالىق باقىلاۋ تۋرالى» زاڭنىڭ وزگەرىستەرى مەن جاڭا نورمالارى تۋرالى بۇگىن الماتىدا وتكەن دوڭگەلەك ۇستەل بارىسىندا جۋرناليستەرگە ق ر ۇلتتىق بانكى تولەم باللانسى جانە ۆاليۋتالىق رەتتەۋ دەپارتامەنتىنىڭ ديرەكتورى ايگۇل بورانبايەۆا اڭگىمەلەدى.

ونىڭ ايتۋىنشا، ۇلتتىق بانك جاڭا زاڭناماعا سايكەس شەتەلدىك ۆاليۋتا قوزعالىسىن قاتاڭ باقىلاۋدا ۇستايتىن بولادى. «تالداۋ كورسەتكەندەي، ءار اي سايىن ۆاليۋتانى ساتىپ الۋدىڭ 30 پايىزىن ساتىپ الۋشىلار مىندەتتەمەلەرىن وتەۋ ءۇشىن ەمەس باسقا ماقساتتا جۇزەگە اسىرادى. وسى وپەراتسيالاردى قاتاڭ باقىلاۋعا الامىز»، - دەدى ول.

ونىڭ ايتۋىنشا، قارىز قازاقستان رەزيدەنتىنە قايتپاعان جاعدايدا مۇنداي مامىلەلەر قۇقىق قورعاۋ ورگاندارىنىڭ نازارىنا ىلىنەدى. ال جالپى العاندا زاڭنامانىڭ باسقا پۋنكتتەرى بويىنشا شارالاردى قاتاڭداتۋ كوزدەلمەيدى.

ايگۇل بورانبايەۆا اتاپ وتكەندەي، زاڭ جوباسىندا ىرىقتاندىرىلعان ۆاليۋتالىق رەجيم قاعيداتتارىن جانە ۆاليۋتالىق رەتتەۋدىڭ قولدانىستاعى اقپاراتتىق قۇرالدارىن ساقتاۋ كوزدەلەدى، سوندىقتان ونى قابىلداۋ تەرىس الەۋمەتتىك-ەكونوميكالىق سالدارلارعا اكەپ سوقپايدى.

«زاڭ جوباسىن ازىرلەۋدىڭ ماقساتى سەرپىندى دامىپ وتىرعان نارىقتار جاعدايىنداعى ۆاليۋتالىق رەتتەۋ جانە ۆاليۋتالىق باقىلاۋ سالاسىندا تۋىندايتىن قۇقىقتىق قاتىناستاردى رەتتەۋدى جەتىلدىرۋ بولىپ تابىلادى. ونىڭ ىشىندە شەتەلدىك ۇيىمدار فيليالدارىنىڭ قازاقستان نارىعىنا كىرۋىنىڭ كەڭەيتىلۋىن ەسكەرە وتىرىپ جانە «استانا» حالىقارالىق قارجى ورتالىعىنىڭ قۇرىلۋىنا بايلانىستى»، - دەدى ول.

زاڭ جوباسىن قابىلداۋ - كاپيتالدىڭ ترانسشەكارالىق قوزعالىسىنىڭ ستاتيستيكالىق مونيتورينگىن جاقسارتۋعا، ۆاليۋتالىق رەتتەۋ رەجيمدەرىنىڭ نەگىزگى راسىمدەرىن وڭتايلاندىرۋعا، كاسىپكەرلىك قىزمەتتە جانە حالىقتىڭ وپەراتسيالارىندا جانە سول سياقتى ماكروەكونوميكالىق دەڭگەيدە ىسكە اسىرىلاتىن قولما-قول اقشاسىز جانە قولما-قول كونۆەرسيالىق وپەراتسيالاردىڭ تاۋەكەلدەرىن بارىنشا ازايتۋعا مۇمكىندىك جاسايدى.

ايگۇل بورانبايەۆا حابارلاعانداي، قازىرگى كەزدە زاڭ جوباسىنىڭ ءماتىنى عىلىمي ساراپتامانىڭ، مەملەكەتتىك ورگانداردىڭ، قوعامدىق قاۋىمداستىقتاردىڭ (ۇلتتىق كاسىپكەرلەر پالاتاسى جانە قازاقستان قارجىگەرلەرىنىڭ قاۋىمداستىعى) ەسكەرتۋلەرى مەن ۇسىنىستارى بويىنشا پىسىقتالۋدا.

«زاڭ جوباسىنىڭ ءماتىنى اشىق تۇردە ۇلتتىق بانكتىڭ سايتىنا 2017-جىلعى 25- مامىردا ورنالاستىرىلعان. ءبىز سونداي-اق زاڭ جوباسى بويىنشا سۇراقتارعا ۇلتتىق بانكتىڭ Facebook- تىڭ «ق ر ۇلتتىق بانكى حابارلايدى، تۇسىندىرەدى، تۇسىنىكتەمە بەرەدى» دەگەن بەتىندە جاۋاپ بەرۋگە دايىنبىز»، - دەپ تولىقتىردى ق ر ۇ ب وكىلى.

اۆتور: گۇلميرا عوسمانالي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى