ەكونوميكا ءمينيسترى رەسەيگە قارسى سانكسيا قازاقستانعا قالاي اسەر ەتەتىنىن ايتتى
بۇل تۋرالى ۇكىمەت وتىرىسىندا ۇلتتىق ەكونوميكا ءمينيسترى تيمۋر سۇلەيمەنوۆ مالىمدەدى دەپ حابارلايدى The Qazaq Times.
ءمينيستردىڭ سوزىنشە، كورشى ەلگە قارسى قابىلدانعان شەكتەۋ شارالارى رەسپۋبليكاعا تىكەلەي اسەر ەتپەيدى، ءبىراق ۇكىمەت قانداي جاعداي بولسا دا دايىن.
«بارىنە دايىن بولۋ كەرەك، ءبىراق اسىرا سىلتەۋدىڭ قاجەتى جوق. مينيسترلىك اياسىندا ۇلتتىق بانكتەگى جانە قارجى مينيسترلىگىندەگى ارىپسەستەرمەن بىرگە كەز كەلگەن جاعدايعا دايىنبىز. دەگەنمەن مۇنى ءبىز توتەنشە جاعداي دەپ ەسەپتەمەيمىز. سانكسيا اسەرى مۇناي، مەتال باعاسىنىڭ كوتەرىلۋى نەمەسە ءتۇسۋى، ءتىپتى باسقا كورشى ەلدەردەگى ەكونوميكانىڭ السىرەۋى كەزىندەگى جاعداي سياقتى بولادى دەپ ەسەپتەيمىز. الايدا بىردەن تەرىس اسەر ەتە قويمايدى»، - دەدى ۆەدومستۆو باسشىسى.
الايدا ول «سانكسيا ۇزاق مەرزىمگە سوزىلاتىن بولسا بۇل رەسەي ەكونوميكاسىنا دا، قازاقستان ەكونوميكاسىنا دا ايتارلىقتاي اسەر ەتەدى» دەگەندى ايتادى.
«ءبىزدىڭ مۇنايىمىزدى تەڭىزبەن اسىرەسە نوۆوروسسيسكپەن بايلانىستىرىپ وتىرعان مۇناي قۇبىرلارىنا قاتىستى ماسەلە كوتەرىلدى. سانكسيادا وعان قول قويىلماعان. سەبەبى امەريكالىق Chevron كومانياسىنىڭ ءوزى كاسپي قۇبىر جەلىسى كونسورتسيۋمىنىڭ ينۆەستورى. سوندىقتان ولار وزدەرىنىڭ كونگرەسى ارقىلى مۇنداي ترانزيتتىك مۇناي قۇبىرلارىن سانكسيا تىزىمىنەن شىعارۋعا قول جەتكىزدى. ياعني بۇل بولىك بويىنشا جەرگىلىكتى نارىققا مۇناي شيكىزاتىن جەتكىزۋدە قيىندىق بولمايدى»، - دەدى ۇ ە م باسشىسى.
دەسەك تە قازاقستاننىڭ ەكونوميكاسى كورشى ەلدىڭ ەكونوميكاسىنا بايلاۋلى ەكەنىن ەسكەرۋ قاجەت. سەبەبى ەكونوميكاعا اسەر ەتەتىن تەك مۇناي نارىعى عانا ەمەس. اۋىل شارۋاشىلىعى ونىمدەرىنىڭ ەكسپورتى، ساۋدا قاتىناسى دا ەل ەكونوميكاسىن قالىپتاستىراتىن نەگىزگى فاكتور.
