سولتۇستىك وڭىرلەرگە قونىس اۋداراتىندارعا كونكۋرسسىز جەر تەلىمدەرى بەرىلمەك
«ۇكىمەت ىشكى قونىس اۋدارۋشىلاردى قابىلدايتىن ءتورت وبلىستى، ياعني سولتۇستىك قازاقستان، پاۆلودار، شىعىس قازاقستان، قوستاناي وبلىستارىن، سونداي-اق شىعۋ وڭىرلەرى رەتىندە بەس وبلىستى: وڭتۇستىك قازاقستان، جامبىل، الماتى، ماڭعىستاۋ وبلىستارىن ايقىندادى. اعىمداعى جىلى وڭتۇستىك قازاقستان، ماڭعىستاۋ جانە الماتى وبلىستارىندا سولتۇستىك وڭىرلەردىڭ جۇمىس بەرۋشىلەرىنىڭ قاتىسۋىمەن بوس ورىندار جارمەڭكەلەرى وتكىزىلدى. ناتيجەسىندە، 2388 وتباسى سولتۇستىك وڭىرلەرگە ۇسىنىلعان جۇمىسقا ورنالاسا وتىرىپ، ەرىكتى تۇردە قونىس اۋدارۋعا نيەت بىلدىرگەن. بۇگىنگە باعدارلاما شەڭبەرىندە وڭتۇستىكتەن سولتۇستىك وڭىرلەرگە ازىرشە 172 وتباسى ەرىكتى تۇردە قونىس اۋداردى جانە 1279 وتباسى قونىس اۋدارۋعا دايىن. ارينە، بۇل وتە از كولەم. سوندىقتان ءبىز باقىتجان ءابدىر ۇلى، ءسىزدىڭ تاپسىرماڭىز بويىنشا ۇكىمەتكە اسقار ۇزاقباي ۇلىنىڭ (مامين - رەد. ) باسشىلىعىمەن بۇل ماسەلەنى جەكە قاراپ، تالداۋ جاسادىق»، - دەپ توقتالدى ول.
نۇرىمبەتوۆتىڭ سوزىنشە، ەگەر دە اتالعان 4 سولتۇستىك وبلىستا اعىمداعى دەموگرافيالىق جانە كوشى- قوندىق ۇردىستەر ساقتالاتىن بولسا، الداعى 5 جىلدا ولاردا ەكونوميكالىق تۇرعىدان بەلسەندى حالىقتىڭ سانى 167 مىڭعا ادامعا ازايىپ كەتۋى ىقتيمال.
«سوندىقتان سول 4 وبلىستا ەڭبەككە جارامدى حالىق سانىن ساقتاپ قالۋ ءۇشىن وڭىرلەرمەن كەلىسە، الداعى 5 جىلدا كەمىندە 59 مىڭ وتباسىن قونىس اۋدارۋىن ۇيىمداستىرۋ قاجەت دەپ شەشىلدى. ول ءۇشىن ازاماتتاردىڭ ەرىكتى قونىس اۋدارۋىنىڭ قوسىمشا ىنتىلاندىرۋ شارالارىن ازىرلەدىك»، - دەپ ءتۇسىندىردى ۆيتسە- مينيستر.
بۇل رەتتە قونىس اۋدارۋشىلارعا كوشى-قون شىعىندارىن وتەۋگە جانە تۇرعىن ءۇي جالداۋعا سۋبسيديانى ساقتاۋ، قونىس اۋدارۋشىلاردىڭ بارلىق ورنالاسۋ ماسەلەلەرىن شەشىپ، تۇراقتى جۇمىسقا ورنالاستىرۋعا دايىن جۇمىس بەرۋشىلەرگە سۋبسيديا قاراستىرۋ، «تۇرعىن- قۇرىلىس ءۇي جيناق بانكى» ارقىلى قونىس اۋدارۋشىلارعا تۇرعىن ۇيلىك نەسيە مەن سۋبسيديالاردى بەرۋدىڭ جەڭىلدەتىلگەن جۇيەسى، قونىس اۋدارۋشىلارعا اۋىل شارۋاشىلىعىمەن اينالىسۋ ءۇشىن وتەۋسىز پايدالانۋ قۇقىعىندا كونكۋرسسىز جەر تەلىمدەرىن بەرۋ، جاڭا بيزنەس يدەيالارى بار «باستاۋ» بيزنەس جوباسى بويىنشا ءبىلىم العان جانە كاسىپكەر پالاتاسىنىڭ وڭ قورىتىندىسىنا يە بولعان قونىس اۋدارۋشىلارعا گرانتتار بەرۋ، سونداي- اق «سەرپىن-2050» جوباسىنا قاتىسۋشى تۇلەكتەردى ولاردىڭ شىققان وڭىرلەرىنە قاراماستان باعدارلاما قاتىسۋشىلارى قۇرامىنا ەنگىزۋ تەتىكتەرى ەسكەرىلىپ وتىر.
«وسىلايشا، جوبالىق باسقارۋ اياسىندا ءبىز 2018-2022 -جىلدارى ەرىكتى تۇردە قونىس اۋدارۋعا جوسپارلاعان 59 مىڭ وتباسى بويىنشا باعدارلاماعا قىركۇيەك ايىندا، سونداي- اق كەيبىر زاڭنامالىق اكتىلەرگە جىل سوڭىنا دەيىن وزگەرىستەر ەنگىزۋ جۇمىستارىن جاساپ جاتىرمىز. بۇل شارالارعا قاجەتتى قوسىمشا قاراجات ونىڭ ىشىندە 2018 -جىلعا 73 ميلليارد تەڭگە تولىقتاي ەسەپتەلىپ، بۇگىندە قارجى مينيسترلىگىمەن بىرگە پىسىقتالۋدا»، - دەدى ول.
