قازاقستاندىق سپورتشىلاردىڭ قايسىسى جومارتتىعىمەن كوزگە ءتۇسىپ ءجۇر؟
ولاردىڭ ىشىندە مۇقتاج جاندارعا كومەگىن اياماعان سپورت سالاسىنىڭ ماماندارى دا بار، دەپ حابارلايدى قازاقپارات ءتىلشىسى.
وتاندىق شوۋ-بيزنەس جانە سپورت جۇلدىزدارىنىڭ قىمبات كولىك ءمىنىپ، الشاڭ باسىپ جۇرگەندەرىنىڭ اراسىندا اتىمتاي جومارتتار جوق ەمەس. ۇيىمداستىرۋشىلاردىڭ ايتۋىنشا، اسىرەسە سپورت سالاسىنىڭ جۇلدىزدارى الەمدىك ۇردىستەردەن قالاتىن ەمەس.
«قازاقستان سپورتىنىڭ اڭىزعا اينالعان تۇلعاسى جاقسىلىق ۇشكەمپىروۆ مىڭبايەۆ اۋىلىندا جاتاقحانا مەن بالاباقشا قۇرىلىسىنىڭ ينۆەستورى بولدى. وسىنىڭ ارقاسىندا 38 جاس وتباسى قونىس تويىن تويلاپ، 100 بالا بالاباقشا تابالدىرىعىن اتتادى.
جاڭا ءبىلىم نىسانىندا قاجەتتى كابينەتتەردىڭ بارلىعى بار. سونداي-اق، جاقسىلىق ۇشكەمپىروۆ جەرگىلىكتى بالالارعا ارناپ سپورت مەكتەبىن اشتى. قازىر مۇندا 300 بالا سامبو، دزيۋدو، بوكسپەن اينالىسىپ جاتىر»، - دەدى سىيلىقتىڭ ۇيلەستىرۋشىسى گۇلزات ساقوۆا.
باتىس قازاقستان وبلىسىندا جاستار سارايىنىڭ بوكس زالىنا وليمپيادا چەمپيونى دانيار ەلەۋسىنوۆتىڭ اتى بەرىلدى.
وليمپياداداعى جەڭىسىنە ارناپ ب ق و اكىمى التاي كۇلگىنوۆ بوكسشى مەن ونىڭ باپكەرى - اكەسىنە ءارقايسىسىنا 10000000 تەڭگەنىڭ سەرتيفيكاتىن تابىستاعان بولاتىن.
الايدا، سپورتشى بۇل قارجىدان باس تارتىپ سال اۋرۋىنا شالدىققان بالالارعا ارنالعان «بايتەرەك» قورىنا اۋداردى. بوكسشى وزىنەن گورى اقشاعا بالالار مۇقتاج دەپ سانايدى.
2015-جىلى سەلدەن جاپا شەككەن الماتىلىقتارعا م م ا ارالاس جەكپە جەك بويىنشا ەلىنىڭ نامىسىن قورعاپ جۇرگەن قۋات (نايمان) حاميتوۆ 1 ميلليون تەڭگە اۋدارعان بولاتىن.
بۇل تۋرالى سپورتشى ءوزىنىڭ Instagram پاراقشاسىندا جازعان.
ايتا كەتۋ كەرەك، الماتىداعى سەلدەن 3 اۋداننىڭ ۇيلەرى سۋعا كەتكەن بولاتىن. 1036 ادام، 51 بالا قاۋىپسىز جەرگە كوشىرىلدى.
قازاقستاندىق بالۋان، گرەك-ريم كۇرەسىنەن ك س ر و سپورت شەبەرى داۋلەت تۇرلىحانوۆ مۇمكىندىگى شەكتەۋلى بۇلدىرشىندەردى سپورتقا تارتۋ ءۇشىن ءتۇرلى اكسيالار وتكىزۋگە سەپتىگىن تيگىزىپ ءجۇر.
سپورتشىنىڭ مۇرىندىق بولۋىمەن ماڭعىستاۋ وبلىستىق بوديبيلدينگ جانە فيتنەس فەدەراتسياسى وسىنداي شارالاردى وتكىزىپ تۇرادى.
بالالاردى سپورتتىق فورمالارمەن، قاجەتتى قۇرالدارمەن، وقۋلىقتارمەن قامتاماسىز ەتىپ كەلەدى.
اۆتور: گۇلميرا عوسمانالي
