باتىس قازاقستاندا ءورت قاۋپى سەيىلەر ەمەس

ب ق و ت ج دەپارتامەنتىنىڭ باسپا ءسوز حاتشىسى نۇرگۇل مۇقانوۆانىڭ ءمالىم ەتكەنىندەي، 5- تامىز كۇنى وڭىردە بىرنەشە قۇرعاق ءشوپتىڭ جانۋ وقيعاسى تىركەلدى.

وسى كۇنى تەرەكتى اۋدانى شالقار اۋىلى ماڭىندا ساعات 18.12 دە شىققان ورتتەن 267 گەكتار جەر وتقا ورانىپ، ساعات 01.29 دا سوندىرىلگەن.

سول كۇنى زەلەنوۆ اۋدانى كوشىم اۋىلدىق وكرۋگىندە وركەن ەلدى مەكەنى ماڭىندا 160 گەكتار، قازتالوۆتىڭ تەرەڭكول اۋىلدىق وكرۋگىندە 224 گەكتار قۇرعاق ءشوپ جانعان. سونداي-اق جانىبەك اۋدانى كۇيگەنكول اۋىلدىق وكرۋگىندە ونەگە ەلدى مەكەنى تۇسىندا 130 گەكتار جەر ورتكە كەتكەن.

بۇگىن تۇستە وسى جانىبەك اۋدانىنا قاراستى اقوبا اۋىلى ماڭىندا قۇرعاق ءشوپتىڭ جانۋى باستالعان. تۇرعىنداردىڭ سوزىنە قاراعاندا، بۇدان ەكى-ءۇش كۇن بۇرىن دالادا بولعان ءورت سوندىرىلگەنىمەن، قايتادان تۇتانىپ كەتكەن.

اۋىل اكىمىنىڭ مىندەتىن اتقارۋشى مەرلان ەركەعۇلوۆ باستاعان تۇرعىندار «ءتىلسىز جاۋمەن» الىسۋدا. وبلىستىڭ وڭتۇستىك اۋداندارىندا قىرىق گرادۋستان اسقان ىستىقتىڭ بەتى ءالى قايتپاي تۇر.

ەسكە سالا كەتەيىك، بيىل بۇعان دەيىن وبلىس اۋماعىندا ەكى ورمان (50,3 گا گەكتار) جانە 19530 گەكتار جەردى قامتىعان 208 دالا ءورتى تىركەلىپ، جانۋ وقيعالارىنىڭ كوبەيۋىنە بايلانىستى اقجايىق، قازتالوۆ اۋداندارىندا جانە بوكەي ورداسىنىڭ سايقىن اۋىلدىق وكرۋگىندە توتەنشە جاعداي جاريالانعان بولاتىن.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى